స్టైలిష్ స్టార్ అల్లు అర్జున్కు సినిమాలతో పాటు ఆయన ఆఫ్స్క్రీన్ వ్యక్తిత్వానికి కూడా భారీగా అభిమానులు ఉన్నారు. తమ అభిమాన హీరోను ఆదర్శంగా తీసుకునే ఫ్యాన్స్.. పలు సామాజిక కార్యక్రమాల్లోనూ చురుగ్గా పాల్గొంటున్నారు. ప్రతి ఏడాది కనీసం ఒక మంచి కార్యక్రమం చేపట్టి సమాజానికి తమ వంతు సాయం చేయాలనే ఉద్దేశంతో ముందుకు సాగుతున్న అల్లు అర్జున్ ఫ్యాన్స్ అసోసియేషన్.. ఈ ఏడాది కీలకమైన ఆరోగ్య అవగాహన కార్యక్రమాన్ని చేపట్టింది.
ఈసారి HPV వ్యాక్సిన్, సర్వైకల్ క్యాన్సర్ నివారణపై అవగాహన కార్యక్రమాన్ని ఏడు రాష్ట్రాల్లో నిర్వహిస్తున్నారు. ఈ కార్యక్రమానికి సంబంధించిన రెండో దశను సెప్టెంబర్ 8, 9 తేదీల్లో నిర్వహించనున్నట్లు అసోసియేషన్ ప్రతినిధి వెల్లడించారు.
ఈ క్యాంపెయిన్లో భాగంగా వర్క్షాప్స్, స్కూల్ అవేర్నెస్ సెషన్స్, కమ్యూనిటీ అవుట్రీచ్ కార్యక్రమాలను నిర్వహించనున్నారు. మొత్తం 1,000కి పైగా అవగాహన కార్యక్రమాలు నిర్వహించాలని లక్ష్యంగా పెట్టుకోగా.. ప్రస్తుత దశలోనే సుమారు 400 కార్యక్రమాలు చేపట్టనున్నారు. ఈ కార్యక్రమం ద్వారా దాదాపు లక్ష మంది బాలికలకు అవగాహన కల్పించడంతో పాటు, HPV వ్యాక్సిన్ను సరైన సమయంలో తీసుకోవడం, సర్వైకల్ క్యాన్సర్ నివారణపై కుటుంబాలకు అవగాహన కల్పించడమే ప్రధాన ఉద్దేశంగా పేర్కొన్నారు.
HPV వ్యాక్సినేషన్పై సరైన సమాచారం అందించడం, సర్వైకల్ క్యాన్సర్ నివారణకు సంబంధించిన అంశాలపై కుటుంబాల్లో అవగాహన పెంచడం ద్వారా ఈ కార్యక్రమం ఉపయోగపడుతుందని ఫ్యాన్స్ అసోసియేషన్ ప్రతినిధి తెలిపారు.
అల్లు అర్జున్ అభిమానులు కేవలం సినిమా వేడుకలు, ఫ్యాన్ ఈవెంట్స్కే పరిమితం కాకుండా సామాజిక సేవా కార్యక్రమాల్లోనూ తమ అభిమానాన్ని చాటుకుంటున్నారు. ప్రతి ఏడాది ఒక మంచి కార్యక్రమం చేపట్టాలనే సంప్రదాయాన్ని కొనసాగిస్తూ ఈసారి ఇలాంటి ముఖ్యమైన ఆరోగ్య అవగాహన కార్యక్రమాన్ని చేపట్టడం విశేషంగా నిలుస్తోంది.
ఇక సినిమాల విషయానికొస్తే.. అల్లు అర్జున్ ప్రస్తుతం వరుస భారీ ప్రాజెక్టులతో బిజీగా ఉన్నారు. దర్శకుడు అట్లీ తెరకెక్కిస్తున్న ‘రాకా’ సినిమాకు సంబంధించిన ఫస్ట్ లుక్ పోస్టర్తోనే దేశవ్యాప్తంగా భారీ హైప్ క్రియేట్ చేశారు. అల్లు అర్జున్ కొత్త అవతార్ను పరిచయం చేసిన ఆ పోస్టర్ సోషల్ మీడియాలో విపరీతమైన చర్చకు దారితీసింది.
అదే సమయంలో దర్శకుడు లోకేష్ కనగరాజ్తో AA23, అలాగే ‘పుష్ప 3: ది ర్యాంపేజ్’ వంటి భారీ ప్రాజెక్టులు కూడా ఆయన లైనప్లో ఉన్నాయి. వరుస పాన్ ఇండియా సినిమాలతో అల్లు అర్జున్ మరోసారి ప్రేక్షకులను అలరించేందుకు సిద్ధమవుతున్నారు.