మిస్టిక్ థ్రిల్లర్ ఫ్రాంచైజీగా ప్రేక్షకుల్లో ప్రత్యేక గుర్తింపు తెచ్చుకున్న ‘పొలిమేర’ సిరీస్ మూడో భాగం ‘పొలిమేర 3’తో మరోసారి ఆసక్తిని పెంచుతోంది. దీపావళి పండుగ సందర్భంగా చిత్రబృందం ఈ సినిమా నుంచి ‘వీరావి’ గ్లింప్స్‌ను విడుదల చేసింది. ఇందులో యాక్షన్ కింగ్ అర్జున్ సర్జాను మునుపెన్నడూ చూడని పవర్‌ఫుల్ అవతార్‌లో పరిచయం చేశారు. డాక్టర్ అనిల్ విశ్వనాథ్ దర్శకత్వం వహిస్తున్న ఈ చిత్రం తెలుగు, తమిళం, కన్నడ, మలయాళ భాషల్లో గ్రాండ్‌గా విడుదల కానుంది.
వంశీ నందిపాటి ఎంటర్‌టైన్‌మెంట్స్ బ్యానర్‌పై విజయవంతమైన నిర్మాత వంశీ నందిపాటి, శ్రీ వెంకటేశ్వర సినిమాస్ ఎల్‌ఎల్‌పీ (ఏషియన్ గ్రూప్)కు చెందిన భరత్ ఎన్. నారంగ్‌తో కలిసి ఈ చిత్రాన్ని నిర్మిస్తున్నారు.
తాజాగా విడుదలైన గ్లింప్స్ ఓ మిస్టీరియస్ టెంపుల్ నేపథ్యంతో ప్రారంభమవుతుంది. అమావాస్య వాతావరణాన్ని ప్రతిబింబిస్తూ సాగిన విజువల్స్ ప్రేక్షకుల్లో ఉత్కంఠను పెంచుతున్నాయి. విష్ణుమూర్తి నుంచి శివుడి రూపానికి జరిగే అద్భుతమైన విజువల్ ట్రాన్సిషన్, అనంతరం అనంత పద్మనాభ స్వామి దివ్య దర్శనం గ్లింప్స్‌కు ప్రత్యేక ఆకర్షణగా నిలిచాయి. ఆధ్యాత్మికత, దైవత్వం, మిస్టరీ, సూపర్ నేచురల్ అంశాల కలయికతో సినిమా ప్రపంచాన్ని దర్శకుడు ఆసక్తికరంగా పరిచయం చేశారు.
ఆ తర్వాత కథ ఒక్కసారిగా చీకటి ప్రపంచంలోకి మలుపు తిరుగుతుంది. సత్యం రాజేష్ కొమరయ్య పాత్రలో చేతబడి చేస్తూ కనిపించడంతో గ్లింప్స్ మరింత ఉత్కంఠభరితంగా మారుతుంది. భయానక వాతావరణం, ఇంటెన్స్ విజువల్స్ ప్రేక్షకుల్లో క్యూరియాసిటీని పెంచుతుండగా, చివర్లో వచ్చే అర్జున్ సర్జా ఎంట్రీ అసలైన హైలైట్‌గా నిలిచింది.
‘వీరావి’గా అర్జున్ సర్జా పవర్‌ఫుల్ వారియర్ అవతార్‌లో కనిపించారు. చేతిలో భారీ ఖడ్గంతో, గంభీరమైన రూపంతో ఆయన స్క్రీన్ ప్రెజెన్స్ అదిరిపోయింది. ఆయన బాడీ లాంగ్వేజ్, ఇంటెన్స్ లుక్ పాత్రకు మరింత బలాన్ని తీసుకొచ్చాయి. ‘బ్లాస్ట్’తో ఇప్పటికే ప్రేక్షకుల్లో ఆసక్తిని రేకెత్తించిన అర్జున్ సర్జా, ఇప్పుడు ‘పొలిమేర’ ప్రపంచంలోకి అడుగుపెట్టడం సినిమాపై అంచనాలను మరో స్థాయికి తీసుకెళ్లింది.
అద్భుతమైన సినిమాటోగ్రఫీ, ఆకట్టుకునే విజువల్స్, పవర్‌ఫుల్ బ్యాక్‌గ్రౌండ్ స్కోర్ ఈ గ్లింప్స్‌ను మరింత ప్రభావవంతంగా మార్చాయి. ముఖ్యంగా డార్క్ సూపర్ నేచురల్ ప్రపంచం నుంచి అర్జున్ సర్జా వారియర్ అవతార్‌కు మారే సీక్వెన్స్ ప్రేక్షకులకు గూస్‌బంప్స్ తెప్పించేలా ఉంది.
‘మా ఊరి పొలిమేర’తో ఓటీటీలో సంచలనం సృష్టించిన ఈ ఫ్రాంచైజీ, ‘పొలిమేర 2’తో థియేటర్లలోనూ ఘన విజయాన్ని అందుకుంది. ప్రతి భాగంతో తన పరిధిని విస్తరించుకుంటూ వచ్చిన ఈ సిరీస్ ఇప్పుడు మూడో భాగంతో మరింత భారీ స్థాయిలో ప్రేక్షకుల ముందుకు రాబోతోంది.
‘పొలిమేర 3’లో సత్యం రాజేష్ కొమరయ్యగా మరోసారి అలరించనున్నారు. ఆయనతో పాటు కామాక్షి భాస్కర్ల, గెటప్ శ్రీను, బాలాదిత్య, రాకేందు మౌళి తదితరులు కీలక పాత్రల్లో నటిస్తున్నారు.
అర్జున్ సర్జా వంటి యాక్షన్ స్టార్ ఎంట్రీ, డాక్టర్ అనిల్ విశ్వనాథ్ ఆసక్తికరమైన కథనం, ఇప్పటికే ప్రేక్షకుల్లో ఆదరణ పొందిన పొలిమేర ఫ్రాంచైజీతో ఈ సినిమా పాన్ ఇండియా స్థాయిలో ఆసక్తిని పెంచుతోంది. తాజాగా విడుదలైన ‘వీరావి’ గ్లింప్స్‌తో ‘పొలిమేర 3’ తదుపరి భాగంపై అంచనాలు మరింత పెరిగాయి.