సూపర్‌స్టార్ రజనీకాంత్ కథానాయకుడిగా తెరకెక్కుతున్న క్రేజీ ప్రాజెక్ట్ ‘ధర్మన్’ నుంచి మరో ఆసక్తికరమైన అప్‌డేట్ వచ్చింది. ఈ సినిమాలో లేడీ సూపర్‌స్టార్ నయనతార భాగమైనట్లు మేకర్స్ అధికారికంగా ప్రకటించారు. ఈ సందర్భంగా ఆమెకు స్వాగతం పలుకుతూ ప్రత్యేక పోస్టర్‌ను విడుదల చేశారు. రజనీకాంత్, నయనతార మరోసారి జతకడుతుండటంతో ఈ సినిమాపై అభిమానుల్లో ఆసక్తి మరింత పెరిగింది.
కమల్ హాసన్‌కు చెందిన రాజ్ కమల్ ఫిల్మ్స్ ఇంటర్నేషనల్ సమర్పణలో రూపొందుతున్న ఈ చిత్రాన్ని కమల్ హాసన్, ఆర్. మహేంద్రన్ నిర్మిస్తున్నారు. అశ్వత్ మారిముత్తు దర్శకత్వం వహిస్తున్నారు. ఇప్పటికే విడుదలైన రజనీకాంత్ ఫస్ట్ లుక్ సినిమాపై ఆసక్తిని పెంచింది. చేతిలో రక్తపు మరకలున్న స్కాల్పెల్‌తో ‘ది డెడ్లీ డాక్టర్’గా ఆయన కనిపించిన తీరు ప్రేక్షకుల్లో క్యూరియాసిటీని పెంచింది.
తాజాగా విడుదలైన పోస్టర్‌లో రజనీకాంత్, నయనతార ఓ భారీ కిటికీ ముందు ఎదురెదురుగా నిలబడి కనిపిస్తున్నారు. కిటికీ నుంచి ప్రసరిస్తున్న బంగారు కాంతి మధ్యలో ఇద్దరి సిల్హౌట్స్ ప్రత్యేక ఆకర్షణగా నిలిచాయి. పోస్టర్‌లోని విజువల్స్ సినిమాపై మరింత ఆసక్తిని రేకెత్తిస్తున్నాయి. ఇందులో రజనీ, నయనతార ఎలాంటి పాత్రల్లో కనిపించనున్నారు? వీరిద్దరి మధ్య కథ ఎలా సాగనుంది? అనే ప్రశ్నలు అభిమానుల్లో ఆసక్తిని పెంచుతున్నాయి.
రజనీకాంత్, నయనతార కలిసి నటించడం ఇది ఐదోసారి. గతంలో ‘చంద్రముఖి’, ‘కథానాయకుడు’, ‘దర్బార్’, ‘పెద్దన్న’ సినిమాల్లో వీరిద్దరూ కలిసి నటించారు. ఇప్పుడు ‘ధర్మన్’తో మరోసారి ప్రేక్షకుల ముందుకు రానున్నారు. దీంతో ఈ క్రేజీ కాంబినేషన్ సినిమాకు ప్రధాన ఆకర్షణగా నిలవనుంది.
‘ధర్మన్’కు రాక్‌స్టార్ అనిరుధ్ రవిచందర్ సంగీతం అందిస్తున్నారు. నికేత్ బొమ్మి సినిమాటోగ్రఫీ బాధ్యతలు నిర్వర్తిస్తుండగా, ప్రదీప్ ఈ. రాఘవ్ ఎడిటర్‌గా పనిచేస్తున్నారు. ప్రముఖ స్టంట్ కొరియోగ్రాఫర్లు అన్బరివ్ యాక్షన్ సన్నివేశాలను రూపొందిస్తున్నారు.
రజనీకాంత్‌ను మిస్టీరియస్ డాక్టర్‌గా పరిచయం చేసిన ఫస్ట్ లుక్‌తో మొదలైన ఆసక్తి.. ఇప్పుడు నయనతార ఎంట్రీతో మరింత పెరిగింది. స్టార్ కాస్ట్, విభిన్నమైన నేపథ్యం, ప్రతిభావంతమైన సాంకేతిక బృందంతో తెరకెక్కుతున్న ‘ధర్మన్’ నుంచి రాబోయే అప్‌డేట్స్‌పై అభిమానులు ఆసక్తిగా ఎదురుచూస్తున్నారు.