జీ5 తెలుగులో విలక్షణ నటుడు జగపతిబాబు హోస్ట్‌గా వ్యవహరిస్తున్న సెలబ్రిటీ టాక్ షో ‘జయమ్ము నిశ్చయమ్మురా’ సీజన్ 2 ప్రేక్షకులను అలరిస్తోంది. ఇప్పటికే తొలి ఎపిసోడ్‌లో సాయి పల్లవి, రెండో ఎపిసోడ్‌లో త్రివిక్రమ్ శ్రీనివాస్, థమన్ సందడి చేశారు. రెండో ఎపిసోడ్‌లో నటుడు సునీల్ ప్రత్యేక అతిథిగా పాల్గొని నవ్వులు పంచుకున్నారు. ఇక ఇప్పుడు మూడో ఎపిసోడ్‌లో ఆంధ్రప్రదేశ్ ఐటీ శాఖ మంత్రి నారా లోకేశ్ ప్రత్యేక అతిథిగా పాల్గొనడం ఆసక్తికరంగా మారింది.
తాజాగా ఈ ఎపిసోడ్‌కు సంబంధించిన ప్రోమో విడుదలైంది. ఇందులో జగపతిబాబుతో కలిసి నారా లోకేశ్ సరదాగా ముచ్చటిస్తూ తన వ్యక్తిగత జీవితానికి సంబంధించిన పలు ఆసక్తికర విషయాలను వెల్లడించారు. స్కూల్ రోజుల అల్లరి నుంచి కుటుంబంలోని సరదా సంఘటనల వరకు అనేక విషయాలను పంచుకున్నారు.
తన స్కూల్ రోజుల గురించి మాట్లాడిన నారా లోకేశ్.. అప్పట్లో తాను చేసిన అల్లరి పనులను గుర్తుచేసుకున్నారు. టీచర్ల నుంచి ఎక్కువగా పనిష్మెంట్లు అందుకునేది తానేనని సరదాగా చెప్పారు. దీంతో జగపతిబాబు నిజంగానే అంత అల్లరి చేసేవారా? అని ప్రశ్నించారు. అందుకు సమాధానంగా తన మామయ్య నందమూరి బాలకృష్ణతో పోటీ పడాల్సి వచ్చేదని లోకేశ్ చమత్కరించారు. ఈ సంభాషణ ప్రోమోలో నవ్వులు పూయిస్తోంది.
తన పెళ్లి సమయంలో జరిగిన ఓ ఆసక్తికరమైన సంఘటనను కూడా నారా లోకేశ్ గుర్తుచేసుకున్నారు. ఓ రోజు తనను ‘అల్లుడుగారు’ అని పిలవడంతో, తనకు ఏదో ఫిట్టింగ్ పెట్టేందుకు ప్లాన్ చేస్తున్నారేమోనని వెంటనే అనుకున్నానని సరదాగా వెల్లడించారు. ఈ సందర్భంగా ఆయన చెప్పిన మాటలు షోలో వినోదాన్ని పంచనున్నాయని ప్రోమో చూస్తే అర్థమవుతోంది.
నందమూరి బాలకృష్ణ గురించి నారా లోకేశ్ చేసిన వ్యాఖ్యలు కూడా ప్రోమోలో ప్రత్యేక ఆకర్షణగా నిలిచాయి. సినిమాల్లో తన పవర్‌ఫుల్ డైలాగులు, మాస్ ఇమేజ్‌తో అభిమానులను అలరించే బాలయ్య.. తన జీవితంలో ఒకే ఒక్క వ్యక్తికి భయపడతారని లోకేశ్ సరదాగా పేర్కొన్నారు. ఆ వ్యక్తి ఎవరనే విషయం పూర్తి ఎపిసోడ్‌లో మరింత ఆసక్తిని రేకెత్తిస్తోంది.
ప్రోమో చివర్లో నారా లోకేశ్ తన మామయ్య బాలకృష్ణ నటించిన ‘లెజెండ్’ సినిమాలోని పాపులర్ డైలాగ్‌ను చెప్పి అలరించారు. “ఫ్లూటు జింక ముందు ఊదు.. సింహం ముందు కాదు!” అంటూ బాలయ్య స్టైల్‌లో డైలాగ్ చెప్పడంతో ప్రోమో ఆసక్తికరంగా ముగిసింది. ఈ సన్నివేశం షోపై మరింత ఆసక్తిని పెంచుతోంది.
‘జయమ్ము నిశ్చయమ్మురా’ సీజన్ 2లో నారా లోకేశ్ పాల్గొన్న ప్రత్యేక ఎపిసోడ్ నవంబర్ 6న జీ5లో ప్రీమియర్ కానుంది. అనంతరం నవంబర్ 8న సాయంత్రం 7:30 గంటలకు జీ తెలుగు ఛానెల్‌లో ప్రసారం కానుంది. రాజకీయ బాధ్యతలతో బిజీగా ఉండే నారా లోకేశ్.. ఈ టాక్ షోలో తన వ్యక్తిగత జీవితానికి సంబంధించిన విషయాలను ఎంత సరదాగా పంచుకున్నారో తెలుసుకోవాలంటే పూర్తి ఎపిసోడ్ చూడాల్సిందే.