హీరో శ్రీరామ్ (శ్రీకాంత్) తమిళ, తెలుగు ప్రేక్షకుల్లో తనకంటూ ప్రత్యేక గుర్తింపు తెచ్చుకున్న సంగతి తెలిసిందే. తాజాగా ఆయన ప్రధాన పాత్రలో నటిస్తున్న సరికొత్త చిత్రం ‘ది మేజ్’. ప్రియాంక, హృతిక శ్రీనివాస్, కమల్ కామరాజు కీలక పాత్రల్లో కనిపించనున్నారు. డాక్టర్ రవికిరణ్ గాడలే దర్శకత్వం వహిస్తున్న ఈ సినిమాను శ్రౌషా కమలా ఆర్ట్స్, యూఆర్ క్రియేషన్స్ బ్యానర్లపై డాక్టర్ ఉడయ్ కె. రెడ్డి పాల్వాయి, డాక్టర్ కేఎస్ఆర్ (కారెడ్డి శ్రీధర్ రెడ్డి), డాక్టర్ భారత్ రెడ్డి గోపు, డాక్టర్ అనిరుధ్ రెడ్డి సోమ నిర్మిస్తున్నారు. డాక్టర్ నైమిషా రెడ్డి కాసిరెడ్డి ఈ చిత్రాన్ని సమర్పిస్తున్నారు.
ప్రస్తుతం రెగ్యులర్ షూటింగ్ జరుపుకుంటున్న ఈ సినిమా సైకలాజికల్ థ్రిల్లర్‌గా తెరకెక్కుతోంది. తాజాగా చిత్రబృందం ‘ది మేజ్’ రివర్స్ టీజర్‌ను విడుదల చేసింది. ప్రమోషన్ విషయంలోనే కొత్తదనం చూపించిన మేకర్స్.. దాదాపు మొత్తం టీజర్‌ను రివర్స్‌లో ప్రజెంట్ చేసి ఆసక్తిని పెంచారు.
టీజర్ ప్రారంభంలోనే వాస్తవం అంటే ఏమిటి? అనే ప్రశ్నను రేకెత్తించే డైలాగ్ వినిపిస్తుంది. ఆ తర్వాత హీరో ఒక్కసారిగా నిద్ర నుంచి మేల్కొంటాడు. అతడి మైండ్‌లో ఎన్నో సంఘటనలు మెరుపులా కదులుతుంటాయి. తాను మాత్రమే నిజమని నమ్ముతున్న కొన్ని విషయాలకు ఆధారాలు వెతుక్కుంటూ అతడు బయలుదేరతాడు. ఈ క్రమంలో పలువురిని అనుసరిస్తూ అసలు నిజాన్ని తెలుసుకునే ప్రయత్నం చేస్తాడు.
ఇక్కడి నుంచే అసలు కథపై ఆసక్తి మొదలవుతుంది. ఇతరులు కేవలం భ్రమలు అని భావిస్తున్న విషయాలు నిజంగానే భ్రమలా? లేక హీరో నమ్ముతున్నట్టుగానే అవన్నీ నిజాలా? ఈ గందరగోళానికి కారణం ఎవరు? అతడి ప్రయాణంలో అండగా నిలిచిన వ్యక్తి ఎవరు? హీరోకు గాయాలు ఎలా అయ్యాయి? హత్యలను అడ్డుకునేందుకు రంగంలోకి దిగిన Homicide Intervention Team అసలు ఏం దర్యాప్తు చేస్తోంది? అనే ప్రశ్నలను టీజర్ ప్రేక్షకుల ముందుంచింది.
చివర్లో హీరోను పోలీసులు అరెస్ట్ చేసి తీసుకెళ్లే సన్నివేశం మరింత ఆసక్తిని రేకెత్తిస్తుంది. చివరి సీన్ మినహా దాదాపు మొత్తం టీజర్‌ను రివర్స్‌లో చూపించడం సినిమాకు సంబంధించిన మిస్టరీని మరింత పెంచింది.
‘ది మేజ్’ కథ ఒకే రాత్రిలో అనూహ్యమైన పరిణామాలను ఎదుర్కొనే ఓ వ్యక్తి చుట్టూ తిరుగుతుంది. అతడి జీవితంలో జరిగిన సంఘటనలతో క్రమంగా వాస్తవం, భ్రమ మధ్య తేడా చెదిరిపోతుంది. భయం, మిస్టరీ, అనూహ్యమైన మలుపులతో కూడిన ఓ మేజ్‌లో చిక్కుకున్న అతడు.. చివరకు అసలు నిజాన్ని ఎలా కనుగొన్నాడన్నదే ఈ సినిమా ప్రధాన కథాంశంగా తెలుస్తోంది.
మొత్తంగా చూస్తే.. రెగ్యులర్ థ్రిల్లర్ టీజర్లకు భిన్నంగా రివర్స్ కాన్సెప్ట్‌తో రూపొందించిన ‘ది మేజ్’ టీజర్ సినిమాపై ఆసక్తిని పెంచింది. శ్రీరామ్ పాత్ర, మిస్టరీతో కూడిన కథనం, చివరి సన్నివేశం కలిపి సినిమాపై అంచనాలు పెంచుతున్నాయి. అసలు ఈ మేజ్‌లో దాగి ఉన్న రహస్యం ఏంటి? అనేది తెలుసుకోవాలంటే సినిమా విడుదల వరకు వేచి చూడాల్సిందే.