మాస్ మహారాజా రవితేజ హీరోగా, శివ నిర్వాణ దర్శకత్వంలో తెరకెక్కుతున్న ఎమోషనల్ ఫ్యామిలీ ఎంటర్‌టైనర్ ‘ఇరుముడి’పై ప్రేక్షకుల్లో భారీ అంచనాలు నెలకొన్నాయి. ఇప్పటికే విడుదలైన ఫస్ట్ గ్లింప్స్, అయ్యప్ప భక్తి గీతం ‘ఇరుముడి కట్టు’ సినిమాపై ఆసక్తిని పెంచగా.. తాజాగా చిత్ర బృందం మరో కీలక అప్‌డేట్‌తో అభిమానులను ఖుషీ చేసింది.
కొద్ది రోజులుగా ‘ఇరుముడి’ విడుదల తేదీ మారే అవకాశం ఉందంటూ సోషల్ మీడియాలో ప్రచారం జరుగుతున్న నేపథ్యంలో, ఆ ఊహాగానాలకు చిత్ర బృందం ఫుల్‌స్టాప్ పెట్టింది. ముందుగా ప్రకటించినట్లుగానే ఆగస్టు 21న ప్రపంచవ్యాప్తంగా థియేటర్లలో ‘ఇరుముడి’ విడుదల కానుందని అధికారికంగా ప్రకటించింది. దీనిని ధృవీకరిస్తూ ’25 Days To Go’ పోస్టర్‌ను విడుదల చేసింది. దీంతో రిలీజ్ డేట్‌పై నెలకొన్న సందేహాలకు తెరపడింది.
కొత్త పోస్టర్‌లో సినిమా హృదయాన్ని ప్రతిబింబించే ఎమోషనల్ సన్నివేశాన్ని మేకర్స్ ఆవిష్కరించారు. రవితేజ పేకాట ఆడుతుండగా, చిన్నారి బేబీ నక్షత్ర వెనుక నుంచి ప్రేమగా కౌగిలించుకునే దృశ్యం ప్రేక్షకులను ఆకట్టుకుంటోంది. ఈ పోస్టర్ కథలో తండ్రీ-కూతుళ్ల మధ్య ఉండే అనుబంధం ఎంత కీలకమో చెప్పకనే చెబుతోంది.
కుటుంబ కథా చిత్రాలను హృద్యంగా తెరకెక్కించడంలో ప్రత్యేక గుర్తింపు తెచ్చుకున్న దర్శకుడు శివ నిర్వాణ, ఈసారి కూడా భావోద్వేగాలతో కూడిన కమర్షియల్ ఎంటర్‌టైనర్‌ను ప్రేక్షకుల ముందుకు తీసుకురానున్నారు. ఇప్పటివరకు విడుదలైన ప్రతి ప్రమోషనల్ కంటెంట్ సినిమాపై అంచనాలను మరింత పెంచింది.
ఈ చిత్రంలో ప్రియా భవాని శంకర్ కథానాయికగా నటిస్తుండగా, మైత్రీ మూవీ మేకర్స్ బ్యానర్‌పై నవీన్ యెర్నేని, వై. రవిశంకర్ నిర్మిస్తున్నారు. సినిమాటోగ్రఫీని విష్ణు శర్మ, ప్రొడక్షన్ డిజైన్‌ను సాహి సురేష్, ఎడిటింగ్‌ను ప్రవీణ్ పూడి అందిస్తున్నారు. సంగీత దర్శకుడు జి.వి. ప్రకాష్ కుమార్ ఇప్పటికే ‘ఇరుముడి కట్టు’ పాటతో ఆకట్టుకోగా, త్వరలో విడుదల కానున్న సెకండ్ సింగిల్ కోసం అభిమానులు ఆసక్తిగా ఎదురుచూస్తున్నారు.
రిలీజ్ కౌంట్‌డౌన్ ప్రారంభమైన నేపథ్యంలో, చిత్ర బృందం ఇక నుంచి ప్రమోషన్స్‌ను మరింత వేగవంతం చేయనుంది. కుటుంబ భావోద్వేగాలు, కమర్షియల్ అంశాలు, రవితేజ కొత్త తరహా పాత్రతో ‘ఇరుముడి’ ఈ ఆగస్టులో ప్రేక్షకులకు ప్రత్యేకమైన సినీ అనుభూతిని అందించేందుకు సిద్ధమవుతోంది.