‘కింగ్ ఆఫ్ ఎంటర్‌టైన్‌మెంట్’ శ్రీ విష్ణు హీరోగా తెరకెక్కుతున్న తాజా చిత్రం ‘కామ్రేడ్ కళ్యాణ్’. పీరియాడిక్ ఫ్లేవర్, రొమాన్స్, కామెడీ, ఎమోషన్‌తో పాటు నక్సలైట్ బ్యాక్‌డ్రాప్‌ను మేళవించిన ఈ సినిమా ఇప్పటికే గ్లింప్స్, టీజర్, పాటలతో మంచి ఆసక్తిని క్రియేట్ చేసింది. తాజాగా మేకర్స్ థియేట్రికల్ ట్రైలర్‌ను విడుదల చేశారు. ట్రైలర్ ఆద్యంతం ఆసక్తికరంగా సాగుతూ సినిమాపై అంచనాలను మరింత పెంచుతోంది.
జనకిరామ్ మారెళ్ల దర్శకత్వం వహిస్తున్న ఈ చిత్రాన్ని కోన వెంకట్ సమర్పిస్తున్నారు. వెంకట కృష్ణ కర్నాటి, సీత కర్నాటి స్కంద వాహన మోషన్ పిక్చర్స్ ఎల్‌ఎల్‌పీ బ్యానర్‌పై నిర్మిస్తున్నారు. అక్టోబర్ 9న ఈ సినిమా థియేటర్లలోకి రానుంది.
ట్రైలర్‌ను చూస్తే కళ్యాణ్ ఓ లోకల్ థియేటర్‌ను నడుపుతూ సరదాగా జీవించే యువకుడిగా కనిపిస్తాడు. అతని తల్లి మాత్రం నందమూరి బాలకృష్ణకు వీరాభిమాని. ఇలాంటి నేపథ్యంలో కళ్యాణ్ జీవితంలోకి ఓ ఒడియా అమ్మాయి రావడం, ఆమెతో ప్రేమలో పడటం, భాషా సమస్య వారి ప్రేమకు అడ్డంకిగా మారడం వంటి అంశాలతో కథ సరదాగా సాగుతుంది.
అయితే కథలో అసలు ట్విస్ట్ అక్కడే మొదలవుతుంది. పోలీసులకు కళ్యాణ్ కోసం వేట మొదలవుతుంది. అతను మోస్ట్ వాంటెడ్ నక్సలైట్ అని తెలియడంతో కథ ఒక్కసారిగా సీరియస్ మలుపు తిరుగుతుంది. తన సహచర నక్సలైట్లను జైలు నుంచి విడిపించేందుకు కళ్యాణ్ తన గ్యాంగ్‌తో కలిసి ఓ పవర్‌ఫుల్ పొలిటిషియన్‌ను కిడ్నాప్ చేయడం ఆసక్తిని రేకెత్తిస్తోంది.
1992లో ఆంధ్రా-ఒడిశా సరిహద్దు ప్రాంతం నేపథ్యంలో కథ సాగుతుంది. ఈ పీరియాడిక్ సెటప్ సినిమాకు ప్రత్యేకమైన ఫీల్‌ను తీసుకొచ్చింది. దర్శకుడు జనకిరామ్ మారెళ్ల కామెడీ, ప్రేమకథ, నక్సలైట్-పోలీస్ సంఘర్షణను ఆసక్తికరంగా మిళితం చేసినట్లు ట్రైలర్ చూస్తే అర్థమవుతోంది.
ట్రైలర్ తొలి భాగం పూర్తిగా కామెడీ, రొమాన్స్‌తో సరదాగా సాగగా, ద్వితీయార్థంలో కథ సీరియస్ టర్న్ తీసుకుంటుంది. అయితే చివర్లో మళ్లీ కామెడీతో ట్రైలర్‌ను ముగించారు. కళ్యాణ్ టార్గెట్ చేసిన పక్షి తప్పించుకోవడంతో పొరపాటున మరో పక్షిపై కాల్చే సన్నివేశం నవ్వులు పూయిస్తోంది.
‘కామ్రేడ్ కళ్యాణ్’లో శ్రీ విష్ణు మరోసారి తనదైన కామెడీ టైమింగ్‌తో అదరగొట్టినట్లు ట్రైలర్ స్పష్టం చేస్తోంది. మొదటి ఫ్రేమ్ నుంచే తన స్క్రీన్ ప్రెజెన్స్‌తో ఆకట్టుకున్నాడు. అతని ప్రత్యేకమైన డైలాగ్ డెలివరీ, ముఖ్యంగా మాటలను మింగుతూ మాట్లాడే శైలి సినిమాలో కామెడీకి ప్రధాన బలంగా కనిపిస్తోంది.
నక్సలైట్ సన్నివేశాల్లో పాత్ర సీరియస్‌గా కనిపించినప్పటికీ, శ్రీ విష్ణు తన సహజమైన హ్యూమర్‌ను వదులుకోకుండా పాత్రను పండించినట్లు తెలుస్తోంది.
మహిమా నంబియార్ ఒడియా అమ్మాయి పాత్రలో ఫ్రెష్‌గా కనిపించగా, శ్రీ విష్ణుతో ఆమె కెమిస్ట్రీ ఆకట్టుకునేలా ఉంది. రాధికా శరత్‌కుమార్ శ్రీ విష్ణు తల్లిగా, బాలకృష్ణ వీరాభిమానిగా మరోసారి తన కామెడీ మార్క్ చూపించనున్నారు. సత్య, సుదర్శన్ తదితరులు కూడా తమ కామెడీతో అలరించేలా కనిపిస్తున్నారు.
మరోవైపు కేరళకు చెందిన పోలీస్ ఆఫీసర్ పాత్రలో షైన్ టామ్ చాకో సీరియస్‌నెస్ తీసుకొచ్చారు. ఉపేంద్ర లిమాయే కూడా కీలక పాత్రలో కనిపించనున్నారు.
సాయి శ్రీరామ్ సినిమాటోగ్రఫీ ట్రైలర్‌లో మరో ప్రధాన ఆకర్షణగా నిలిచింది. ఆంధ్రా-ఒడిశా సరిహద్దు ప్రాంతంలోని పచ్చని ప్రకృతి, గ్రామీణ వాతావరణాన్ని ఆయన అందంగా తెరకెక్కించారు. 1992 నాటి కాలాన్ని తెరపై సహజంగా చూపించడంలో విజువల్స్ కీలక పాత్ర పోషిస్తున్నాయి.
విజయ్ బుల్గానిన్ అందించిన బ్యాక్‌గ్రౌండ్ స్కోర్ కామెడీ సన్నివేశాలకు మంచి ఎనర్జీని అందించడంతో పాటు నక్సలైట్ ఎపిసోడ్స్‌లో టెన్షన్‌ను పెంచుతోంది. చోటా కె. ప్రసాద్ ఎడిటింగ్ ట్రైలర్‌ను ఎంగేజింగ్‌గా, మంచి పేసింగ్‌తో ఉంచింది. ప్రొడక్షన్ డిజైన్ కూడా పీరియాడిక్ నేపథ్యానికి తగ్గట్టుగా ఆకట్టుకునేలా ఉంది.
మొత్తంగా ‘కామ్రేడ్ కళ్యాణ్’ ట్రైలర్ సినిమా కేవలం కామెడీ, రొమాన్స్‌కే పరిమితం కాకుండా దాని వెనుక ఓ ఆసక్తికరమైన సీరియస్ కాన్‌ఫ్లిక్ట్ కూడా ఉందనే విషయాన్ని తెలియజేసింది. శ్రీ విష్ణు కామెడీ టైమింగ్, పీరియాడిక్ బ్యాక్‌డ్రాప్, ప్రేమకథ, నక్సలైట్ ఎలిమెంట్స్ ప్రేక్షకుల్లో ఆసక్తిని పెంచుతున్నాయి. అక్టోబర్ 9న థియేటర్లలో ఈ సినిమా ఎలాంటి మెప్పును అందుకుంటుందో చూడాలి.