సౌత్ ఇండియన్ మ్యూజిక్ సెన్సేషన్ అనిరుధ్ రవిచందర్ ఓ ఇంటివాడయ్యారు. సన్‌రైజర్స్ హైదరాబాద్ సహ యజమాని, వ్యాపారవేత్త కావ్య మారన్‌తో ఆయన వివాహ బంధంలోకి అడుగుపెట్టారు. గత కొంతకాలంగా వీరిద్దరి పెళ్లిపై వస్తున్న వార్తలకు తెరదించుతూ నవంబర్ 11న గ్రీస్‌లో ఈ జంట ఒక్కటయ్యారు. కుటుంబ సభ్యులు, అత్యంత సన్నిహితులు, పలువురు ప్రముఖుల సమక్షంలో ఈ వివాహ వేడుక అంగరంగ వైభవంగా జరిగినట్లు సమాచారం.
తమ పెళ్లికి సంబంధించిన ఫొటోలను అనిరుధ్ ఇన్‌స్టాగ్రామ్‌లో షేర్ చేయడంతో అభిమానులకు అసలు విషయం తెలిసింది. ఈ సందర్భంగా ఆయన పెట్టిన క్యాప్షన్ కూడా అందరినీ ఆకట్టుకుంటోంది. “My once in a lifetime, for a lifetime 11.11” అంటూ తన జీవితంలో అత్యంత ప్రత్యేకమైన రోజును గుర్తు చేసుకున్నారు. ప్రస్తుతం ఈ ఫొటోలు సోషల్ మీడియాలో తెగ వైరల్ అవుతున్నాయి.
ఇక పెళ్లి దుస్తుల్లో అనిరుధ్, కావ్య జంట చూడముచ్చటగా కనిపించారు. అనిరుధ్ ఐవరీ కలర్ కుర్తా, మ్యాచింగ్ వెష్టీ ధరించగా.. దానిపై అందమైన ఎంబ్రాయిడరీతో రూపొందించిన లాంగ్ జాకెట్‌ను వేసుకున్నారు. సంప్రదాయ లుక్‌లో చాలా క్లాసీగా కనిపించారు. మరోవైపు కావ్య మారన్ బ్లష్ పింక్ కలర్ లెహంగాలో మెరిసిపోయారు. ఎంబ్రాయిడరీ, సీక్వెన్స్ వర్క్‌తో ప్రత్యేకంగా రూపొందించిన లెహంగాకు మ్యాచింగ్ బ్లౌజ్ ధరించి, చోకర్ నెక్లెస్, ఇయర్ రింగ్స్‌తో అందంగా ముస్తాబయ్యారు. ఇద్దరూ ఒకే తరహా పాస్టెల్ కలర్ దుస్తుల్లో కనిపించడం ఈ ఫొటోలకు మరింత ప్రత్యేకతను తీసుకొచ్చింది.
నవంబర్ 10, 11 తేదీల్లో గ్రీస్‌లో పెళ్లి వేడుకలు జరిగినట్లు తెలుస్తోంది. ఈ వేడుకకు సూపర్ స్టార్ రజనీకాంత్, తమిళనాడు మాజీ ముఖ్యమంత్రి ఎంకే స్టాలిన్ సహా పలువురు ప్రముఖులు హాజరైనట్లు సమాచారం. వీరు తమ కుటుంబ సభ్యులతో కలిసి గ్రీస్‌కు వెళ్లిన ఫొటోలు, వీడియోలు కూడా గతంలో సోషల్ మీడియాలో వైరల్ అయ్యాయి.
ఇక గ్రీస్‌లో పెళ్లి వేడుక ముగిసిన తర్వాత నవంబర్ 21న చెన్నైలో మరో గ్రాండ్ రిసెప్షన్ నిర్వహించేందుకు ఏర్పాట్లు చేస్తున్నట్లు వార్తలు వస్తున్నాయి. కావ్య తల్లిదండ్రులు కళానిధి మారన్, కావేరి మారన్ తెలంగాణ ముఖ్యమంత్రి రేవంత్ రెడ్డిని కలిసి ఈ వేడుకకు ఆహ్వానించినట్లు ముఖ్యమంత్రి కార్యాలయం వెల్లడించింది. ప్రధాని నరేంద్ర మోదీ, సోనియా గాంధీ, రాహుల్ గాంధీ, ప్రియాంక గాంధీ వాద్రా సహా పలువురు రాజకీయ ప్రముఖులకు ఆహ్వానాలు అందినట్లు ప్రచారం జరుగుతోంది.
సినిమా ఇండస్ట్రీ నుంచి రజనీకాంత్, కమల్ హాసన్, ఏఆర్ రెహమాన్, ధనుష్, అజిత్ కుమార్, అల్లు అర్జున్, శివకార్తికేయన్ తదితరులు ఈ రిసెప్షన్‌కు హాజరయ్యే అవకాశం ఉందని వార్తలు వినిపిస్తున్నాయి. ఇక సన్‌రైజర్స్ హైదరాబాద్‌తో కావ్యకు ఉన్న అనుబంధం నేపథ్యంలో క్రికెటర్లు అభిషేక్ శర్మ, ఇషాన్ కిషన్ వంటి ఆటగాళ్లు కూడా ఈ వేడుకలో సందడి చేయనున్నట్లు సమాచారం. అయితే వీరి హాజరుపై అధికారిక ప్రకటన రావాల్సి ఉంది.
అనిరుధ్ విషయానికి వస్తే.. ‘వై దిస్ కొలవెరి డి’ పాటతో ఒక్కసారిగా దేశవ్యాప్తంగా గుర్తింపు తెచ్చుకున్న ఆయన, ఆ తర్వాత స్టార్ మ్యూజిక్ డైరెక్టర్‌గా ఎదిగారు. రజనీకాంత్, విజయ్, ధనుష్, షారుఖ్ ఖాన్, పవన్ కల్యాణ్ వంటి ప్రముఖ హీరోల సినిమాలకు సంగీతం అందించారు. ప్రస్తుతం పలు భారీ ప్రాజెక్టులతో బిజీగా ఉన్నారు.
మరోవైపు కావ్య మారన్ సన్ గ్రూప్ ఛైర్మన్ కళానిధి మారన్ కుమార్తె. వార్విక్ బిజినెస్ స్కూల్‌లో ఎంబీఏ పూర్తి చేసిన ఆమె, సన్ టీవీ నెట్‌వర్క్‌లో కీలక బాధ్యతలు నిర్వహిస్తున్నారు. ప్రస్తుతం సన్‌రైజర్స్ హైదరాబాద్ సీఈఓగా వ్యవహరిస్తున్నారు.
మొత్తానికి సినిమాలు, క్రికెట్, వ్యాపార రంగాలకు చెందిన రెండు ప్రముఖ కుటుంబాలను ఒక్కటి చేసిన ఈ వివాహం ఇప్పుడు హాట్ టాపిక్‌గా మారింది. గ్రీస్‌లో జరిగిన పెళ్లి ఫొటోలు అభిమానులను ఆకట్టుకుంటుండగా.. చెన్నైలో జరగనున్న రిసెప్షన్ ఎలా ఉండబోతోందన్న ఆసక్తి అందరిలోనూ నెలకొంది.