ఛాంపియన్ మూవీ హిట్ తర్వాత మరో ఆసక్తికరమైన రొమాంటిక్ కామెడీ మూవీతో ప్రేక్షకుల ముందుకు వస్తున్నారు రోషన్ మేక. దర్శకుడు శైలేష్ కొలను – నిర్మాత సూర్యదేవర నాగవంశీ కాంబినేషన్లో రూపొందుతున్న కొత్త చిత్రానికి ‘ఏమో ఏమో ఇది’ అనే టైటిల్ను ఖరారు చేశారు. ప్రేమికుల దినోత్సవం సందర్భంగా టైటిల్తో పాటు విడుదలైన గ్లింప్స్ మంచి స్పందన అందుకుంది.
విడుదలైన గ్లింప్స్ సరదా తల్లి–కొడుకుల సంభాషణతో మొదలవుతుంది. నేటి జెన్ జీ రిలేషన్షిప్స్, ఆధునిక పెళ్లిళ్లపై చమత్కారంగా రాసిన డైలాగ్స్ ఆకట్టుకుంటాయి. హాస్యంతో పాటు తరం మార్పులపై చిన్న చిట్టి పరిశీలన కనిపిస్తుంది.
కథానాయిక ప్రవేశం చాలా సింపుల్గా, కానీ భావోద్వేగంగా మలిచారు. తన ప్లేలిస్ట్లోని ఓ పాత క్లాసిక్ పాటను ఆస్వాదిస్తూ కనిపించే ఆ క్షణం ద్వారా ఆమె ప్రేమ పట్ల ఉన్న అనుబంధం, అంతర్లీన భావాలు స్పష్టమవుతాయి. చిన్న సన్నివేశంతోనే పాత్ర స్వభావాన్ని బలంగా స్థాపించారు.
ఇప్పటివరకు ఉత్కంఠభరితమైన థ్రిల్లర్లతో ప్రేక్షకులను అలరించిన శైలేష్ కొలను, ముఖ్యంగా HIT సిరీస్తో తనకంటూ ప్రత్యేక గుర్తింపు తెచ్చుకున్నారు. ఇప్పుడు పూర్తిగా విభిన్నమైన రొమాంటిక్ కామెడీ జానర్లో అడుగుపెడుతున్నారు. ఇది ఆయన కెరీర్లో తొలి లైట్-హార్ట్ ఎంటర్టైనర్ కావడం విశేషం.
అభయ్ పాత్రలో రోషన్ మేకా కనిపించనున్నారు. పెళ్లి సందడితో హీరోగా పరిచయమైన రోషన్, ఈసారి జెన్ జీ ప్రేమలో తడబడే పక్కింటి అబ్బాయి పాత్రలో కనిపించనున్నారు.
అపూర్వ పాత్రలో ప్రీతి ముకుందన్ నటిస్తున్నారు. గ్లింప్స్లో ఆమె స్క్రీన్ ప్రెజెన్స్ ఉత్సాహంగా, సహజంగా కనిపించింది.
గ్లింప్స్లో వినిపించిన నేపథ్య సంగీతం, హాయిగా కనిపించిన విజువల్స్ ప్రేమకథ వాతావరణాన్ని బలపరిచాయి.
సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ పతాకాలపై ఈ చిత్రం రూపొందుతోంది. శ్రీకర స్టూడియోస్ సమర్పణలో సినిమా 2026 దసరా కానుకగా విడుదల కానుంది.
