ఫైర్ స్టార్మ్ తో పవర్ స్టార్ అభిమానుల్ని ఒక ఊపు ఊపేసిన ఓజి ఇప్పుడు సువ్వి సువ్వి అంటూ పవర్ఫుల్ మెలోడీ తో మనముందుకొచ్చింది. ఈ చిత్రానికి సుజీత్ దర్శకత్వం వహిస్తున్నారు. డీవీవీ ఎంటర్టైన్మెంట్ పతాకంపై డీవీవీ దానయ్య, కళ్యాణ్ దాసరి ప్రతిష్టాత్మకంగా నిర్మిస్తున్న ఓజస్ గంభీర పాత్రలో పవన్ కళ్యాణ్ ఆకట్టుకోనుండగా, ప్రియాంక అరుళ్ మోహన్ కథానాయికగా నటిస్తున్నారు.
ఈ సినిమాకి సంగీత మాంత్రికుడు ఎస్. తమన్ సంగీతం అందిస్తున్నారు. ఫైర్ స్టార్మ్ వంటి మాస్ నెంబర్ తర్వాత తాజాగా విడుదలైన రెండో పాట ‘సువ్వి సువ్వి’ మాత్రం పూర్తిగా విభిన్నమైన మూడ్లో, హృదయాలను హత్తుకునేలా సాగింది. విడుదలైన క్షణాల్లోనే ఈ మెలోడి శ్రోతల మనసులను గెలుచుకుంటూ ట్రెండింగ్లోకి దూసుకెళ్తోంది.
శృతి రంజని ఆలపించిన ఈ పాటను తమన్ అత్యంత ఆత్మీయంగా స్వరపరిచారు. కళ్యాణ్ చక్రవర్తి త్రిపురనేని రాసిన సాహిత్యం ఈ గీతానికి మరింత అందాన్ని జోడించింది. ప్రేమ గీతాల విషయంలో ఎందుకు తమన్ ఎప్పటికీ అగ్రగామిగా నిలుస్తున్నారో మరోసారి నిరూపించింది.
విజువల్స్లో పవన్ కళ్యాణ్ – ప్రియాంక అరుళ్ మోహన్ జంట చూడ ముచ్చటగా ఆకట్టుకుంటోంది. గంభీరుడైన పవన్ పాత్రకు సమతుల్యం చేస్తూ, కన్మణిగా ప్రియాంక తెరపై కనిపించే తీరు మరింత అందంగా అనిపిస్తోంది. ఈ జంట ఇప్పుడు అభిమానుల్లో పెద్ద ఎక్స్పెక్టేషన్ క్రియేట్ చేసింది.
ఈ చిత్రంలో ఇమ్రాన్ హష్మీ, ప్రకాష్ రాజ్, శ్రియా రెడ్డి కీలక పాత్రలు పోషిస్తున్నారు. కెమెరా వర్క్ను రవి కె చంద్రన్, మనోజ్ పరమహంస నిర్వహిస్తుండగా, ఎడిటింగ్ బాధ్యతలు నవీన్ నూలి చేపట్టారు. శక్తివంతమైన సాంకేతిక బృందం చేతుల్లో ‘ఓజీ’ ఓ అద్భుతమైన సినిమాటిక్ అనుభూతి ఇవ్వడానికి రూపుదిద్దుకుంటోంది.
ప్రేక్షకులు అత్యంత ఆసక్తిగా ఎదురుచూస్తున్న భారతీయ చిత్రాలలో ఒకటైన ‘ఓజీ’ సెప్టెంబర్ 25, 2025న ప్రపంచవ్యాప్తంగా విడుదల కానుంది. ఇప్పటివరకు వచ్చిన ప్రతి అప్డేట్ సెన్సేషన్గా మారిన ఈ సినిమాలో తాజాగా విడుదలైన ‘సువ్వి సువ్వి’ మెలోడి కూడా అంచనాలను మరింతగా పెంచింది.
