టాలీవుడ్లో ప్రయోగాత్మక కథలతో తనదైన గుర్తింపు సాధించాలనే ప్రయత్నంలో ఉన్న యువ నటుడు Roshan Meka నటించిన తాజా చిత్రం చాంపియన్ (Champion) ఇప్పుడు ఓటీటీ ప్రేక్షకుల ముందుకు రావడానికి సిద్ధమైంది. స్వాతంత్ర్యానంతర భారతదేశం నేపథ్యంలో, నిజాం పాలనలోని రజాకార్ వ్యవస్థను స్పృశిస్తూ రూపొందిన ఈ పీరియడ్ యాక్షన్ డ్రామా, స్పోర్ట్స్ ఎలిమెంట్స్తో ప్రత్యేకతను సంతరించుకుంది. దర్శకుడు ప్రదీప్ అద్వైతం తీసుకున్న నిజాయితీగల ప్రయత్నం సినిమా విడుదల సమయంలో విశేషంగా ప్రశంసలు అందుకుంది.
తాజా అప్డేట్ ప్రకారం, చాంపియన్ జనవరి 29 (గురువారం) నుంచి Netflixలో స్ట్రీమింగ్కు రానుంది. డిజిటల్ ప్రీమియర్ తేదీని ఓటీటీ ప్లాట్ఫామ్ తన క్యాటలాగ్లో అధికారికంగా అప్డేట్ చేసింది. ప్రస్తుతం డబ్బింగ్ వెర్షన్లపై స్పష్టత లేకపోగా, థియేట్రికల్ రన్ పూర్తైన ఐదు వారాల తర్వాత ఓటీటీకి రావడం గమనార్హం.
ఈ చిత్రంతో ప్రముఖ మాలీవుడ్ నటి Anaswara Rajan టాలీవుడ్లోకి అడుగుపెట్టింది. ప్రియాంక దత్, జీకే మోహన్, జెమినీ కిరణ్లు స్వప్న సినిమా, ఆనంది ఆర్ట్ క్రియేషన్స్, కాన్సెప్ట్ ఫిలిమ్స్ బ్యానర్లపై నిర్మించగా, జీ స్టూడియోస్ ఈ సినిమాను ప్రెజెంట్ చేసింది. నందమూరి కళ్యాణ చక్రవర్తి, మురళీ శర్మ, సంతోష్ ప్రతాప్ తదితరులు కీలక పాత్రల్లో నటించారు. సంగీతాన్ని Mickey J Meyer అందించారు.