యువగళం పాదయాత్రలో ఇచ్చిన హామీని నిలబెట్టుకుంటూ మంత్రి నారా లోకేష్ జాబ్ క్యాలెండర్ విడుదల చేయడం రాష్ట్రవ్యాప్తంగా చర్చనీయాంశంగా మారింది. ఉగాది కానుకగా ప్రకటించిన ఈ నిర్ణయం యువతలో ఆశలు రేకెత్తించగా, ఉద్యోగాల కోసం ఎదురుచూస్తున్న అభ్యర్థుల నుంచి గణనీయమైన పాజిటివ్ రెస్పాన్స్ కనిపిస్తోంది.
ఈ జాబ్ క్యాలెండర్లో మొత్తం 10,060 ఉద్యోగాలను ప్రకటించడం ప్రత్యేక ఆకర్షణగా నిలిచింది. ముఖ్యంగా గత కొన్నేళ్లుగా ప్రభుత్వ ఉద్యోగాలపై స్పష్టత లేకపోవడం వల్ల నిరాశ చెందిన యువతకు ఇది ఒక నూతన ఆరంభంగా భావిస్తున్నారు. “ఇప్పటికైనా వ్యవస్థలో పారదర్శకత వస్తుంది” అనే అభిప్రాయం అభ్యర్థుల్లో వ్యక్తమవుతోంది.
మంత్రి లోకేష్ చేసిన మరో ముఖ్య ప్రకటన ప్రతి సంవత్సరం ఉగాది రోజునే జాబ్ క్యాలెండర్ విడుదల చేస్తామని చెప్పడం యువతలో విశ్వాసాన్ని పెంచింది. నిరంతర ప్రణాళికతో ఉద్యోగాల భర్తీ జరగనుందనే సంకేతంగా దీనిని విశ్లేషకులు భావిస్తున్నారు.
సోషల్ మీడియాలో కూడా ఈ అంశంపై చర్చలు జోరుగా సాగుతున్నాయి. ఎన్నికల సమయంలో ఇచ్చిన హామీని అమలు చేయడం ద్వారా లోకేష్ తన మాటకు కట్టుబడి ఉన్నారని పలువురు అభిప్రాయపడుతున్నారు. “మాటిస్తే చేస్తారు” అనే ఇమేజ్ను బలపరచే చర్యగా దీనిని కొందరు రాజకీయ విశ్లేషకులు చూస్తున్నారు.
ఇక గత ప్రభుత్వ హయాంలో జాబ్ క్యాలెండర్ అంశం వివాదాస్పదంగా మారిన సందర్భాలను గుర్తుచేస్తూ, ఈసారి తీసుకున్న నిర్ణయాన్ని చాలా మంది స్వాగతిస్తున్నారు. ఉద్యోగాల విషయంలో స్పష్టమైన రోడ్మ్యాప్ ఇవ్వడం యువతకు ఒక భరోసాగా మారిందని అభిప్రాయాలు వ్యక్తమవుతున్నాయి.