దుల్కర్ సల్మాన్ హీరోగా నటిస్తున్న మోస్ట్ అవైటెడ్ యాక్షన్ థ్రిల్లర్ ‘ఐ యామ్ గేమ్’ నుంచి తాజాగా విడుదలైన కొత్త పోస్టర్ ప్రేక్షకులను విశేషంగా ఆకట్టుకుంటోంది. స్టైలిష్ మరియు ఇంటెన్స్ లుక్‌లో కనిపించిన దుల్కర్ సల్మాన్, సినిమాపై ఉన్న అంచనాలను మరింత పెంచేశారు.
ఓనం కానుకగా ఆగస్టు 20, 2026న ప్రపంచవ్యాప్తంగా గ్రాండ్‌గా విడుదల కానున్న ఈ చిత్రం ప్రస్తుతం పోస్ట్ ప్రొడక్షన్ పనులను వేగంగా పూర్తి చేసుకుంటోంది.
దుల్కర్ సల్మాన్ సొంత నిర్మాణ సంస్థ వేఫరర్ ఫిల్మ్స్ బ్యానర్‌పై తెరకెక్కుతున్న ఈ భారీ బడ్జెట్ యాక్షన్ ఎంటర్‌టైనర్‌కు ‘ఆర్డీఎక్స్’ ఫేమ్ నహాస్ హిదాయత్ దర్శకత్వం వహిస్తున్నారు. దుల్కర్ సల్మాన్, జోమ్ వర్గీస్ సంయుక్తంగా నిర్మిస్తున్న ఈ చిత్రానికి షహబాస్ రషీద్, ఆదర్శ్ సుకుమారన్ కథ, స్క్రీన్‌ప్లే అందించారు.
దక్షిణ భారతదేశంలోని 100కు పైగా లొకేషన్లలో చిత్రీకరించిన ‘ఐ యామ్ గేమ్’ ప్రస్తుతం మలయాళ సినీ పరిశ్రమలో అత్యంత ఆసక్తిగా ఎదురుచూస్తున్న చిత్రాల్లో ఒకటిగా నిలిచింది. భారీ నిర్మాణ విలువలు, హై-ఆక్టేన్ యాక్షన్ ఎపిసోడ్స్, స్టైలిష్ మేకింగ్‌తో ఈ సినిమా 2026లో అత్యంత భారీ విడుదలల్లో ఒకటిగా నిలవనుందని ట్రేడ్ వర్గాలు భావిస్తున్నాయి.
దుల్కర్ సల్మాన్ కెరీర్‌లో 40వ చిత్రంగా రూపొందుతున్న ఈ సినిమాలో ఆయన ఇప్పటివరకు కనిపించని అత్యంత స్టైలిష్ మరియు మాస్ అవతార్‌లో కనిపించబోతున్నారు. ఇప్పటికే విడుదలైన ఫస్ట్ లుక్, సెకండ్ లుక్ పోస్టర్లకు సోషల్ మీడియాలో అద్భుతమైన స్పందన లభించగా, తాజాగా వచ్చిన పోస్టర్ కూడా అభిమానులను విశేషంగా ఆకట్టుకుంటోంది.
ఈ చిత్రంలో ఆంటోని వర్గీస్, మిస్కిన్, కాయడు లోహర్, కతిర్, పార్థ్ తివారి, సంయుక్త విశ్వనాథన్ కీలక పాత్రలు పోషిస్తున్నారు. జేక్స్ బిజోయ్ సంగీతం అందిస్తుండగా, యాక్షన్ సన్నివేశాలను ప్రముఖ స్టంట్ మాస్టర్స్ అన్‌బరివ్ రూపొందిస్తున్నారు.
‘లోకా’ వంటి బ్లాక్‌బస్టర్ తర్వాత వేఫరర్ ఫిల్మ్స్ నుంచి వస్తున్న మరో ప్రతిష్టాత్మక ప్రాజెక్ట్‌గా ‘ఐ యామ్ గేమ్’ రూపొందుతోంది. మలయాళం, తెలుగు, తమిళం, హిందీ, కన్నడ భాషల్లో పాన్ ఇండియా స్థాయిలో విడుదల కానున్న ఈ చిత్రం ప్రేక్షకులకు భారీ స్థాయి యాక్షన్ ఎంటర్‌టైన్‌మెంట్‌ను అందించేందుకు సిద్ధమవుతోంది.