కలర్ ఫోటో వంటి ప్రశంసలు పొందిన చిత్రాన్ని అందించిన దర్శకుడు సందీప్ రాజ్, తన సినిమాల విడుదల దశలో వరుసగా ఎదురవుతున్న సమస్యలపై గుండెను తాకేలా ఒక భావోద్వేగ నోట్‌ను ట్విట్టర్లో షేర్ చేశారు. ఈ పోస్ట్ ప్రస్తుతం అభిమానులు, సినీ ప్రముఖుల్లో చర్చనీయాంశమైంది.
తన సందేశంలో సందీప్, కలర్ ఫోటో మరియు త్వరలో విడుదలకానున్న మౌగ్లీ సినిమాలకు ఎంతో ప్యాషన్‌తో పనిచేసిన టీమ్స్ ఉన్నప్పటికీ, రెండు సినిమాలకూ విడుదల సమయానికి దురదృష్టం వెంటాడిందని చెప్పారు.
ఈ రెండు సినిమాలకు రెండు కామన్ పాయింట్లు ఉన్నాయని ఆయన గుర్తుచేశారు.. అవేంటంటే… విడుదల సమయంలో ఎదురైన దురదృష్టకర పరిస్థితులు, తానే ఆ చిత్రాల దర్శకుడు కావడం.
“బహుశా నేను దురదృష్టవంతుడిని. ఎప్పుడూ నేనూ అలాగే అనిపించుకుంటున్నాను,” అని సందీప్ రాశారు. “Directed by Sandeep Raj” అనే తన జీవిత స్వప్నం ఇలా ఇబ్బందులు ఎదుర్కోవడం వల్ల తన మనసు బాదపడుతోందని చెప్పి, “సిల్వర్‌స్క్రీన్ నన్ను ఇష్టపడదనుకుంటా” అని తన నిరాశను వ్యక్తం చేశారు.
మౌగ్లీ గురించి మాట్లాడిన సందీప్, రోషన్, సరోజ్ గారు, సాక్షి, హర్ష, డీఓపీ మారుతీ, భైరవ తదితరులు చూపిన అంకితభావాన్ని ప్రత్యేకంగా ప్రస్తావించారు. “ఈ సినిమా రక్తం, చెమట, ప్యాషన్‌తో తయారైంది” అని ఆయన రాశారు.
సందీప్ పోస్ట్‌కు పరిశ్రమలోని పలువురు కళాకారులు, దర్శకులు, టెక్నీషియన్లు, అభిమానులు స్పందిస్తూ, ఆయనకు ధైర్యం చెబుతున్నారు. కష్టాలు ఒక దర్శకుడిని నిర్వచించవని, ఆయన కథ చెప్పే శైలి ఎప్పటికీ ప్రత్యేకమేనని అంటూ మద్దతు తెలుపుతున్నారు.
