హర్ష్ రోషన్, నక్షత్ర జంటగా నటించిన ‘తెల్లకాగితం’ సినిమా విడుదలకు సిద్ధమైంది. అరుణాచల క్రియేషన్స్ బ్యానర్‌పై కృష్ణ కొమ్మాలపాటి నిర్మిస్తున్న ఈ చిత్రానికి రమేష్ బండ్రెడ్డి దర్శకత్వం వహించారు. నందు సవిరిగాన కథ, స్క్రీన్‌ప్లే, మాటలు అందించారు. అక్టోబర్ 2న ఈ సినిమా థియేటర్లలో విడుదల కానుంది.
విడుదలకు ముందు హైదరాబాద్‌లో ‘తెల్లకాగితం’ ప్రీ రిలీజ్ ఈవెంట్‌ను ఘనంగా నిర్వహించారు. నిర్మాత, టీఎఫ్‌డీసీ ఛైర్మన్ దిల్ రాజుతో పాటు దర్శకులు అనిల్ రావిపూడి, కొరటాల శివ, చందు మొండేటి, వశిష్ట, శైలేష్ కొలను, ‘కోర్ట్’ దర్శకుడు రామ్ జగదీష్, నిర్మాత బండ్ల గణేష్ తదితరులు ఈ కార్యక్రమానికి హాజరై చిత్ర బృందానికి శుభాకాంక్షలు తెలిపారు.
హర్ష్ రోషన్ మాట్లాడుతూ, ‘తెల్లకాగితం’ కోసం తాను రొటీన్ కమర్షియల్ కథలను కాకుండా మంచి ఎమోషన్, బలమైన కథ ఉన్న సినిమాను ఎంచుకున్నానని చెప్పారు. ఇటీవల సినిమా నుంచి ఒక వీడియో లీక్ కావడం, దానిపై సోషల్ మీడియాలో విమర్శలు రావడం గురించి కూడా ఆయన స్పందించారు. కేవలం ఒక క్లిప్ ఆధారంగా సినిమాను అంచనా వేయకుండా అక్టోబర్ 2న పూర్తి సినిమా చూసిన తర్వాత ప్రేక్షకులు తమ అభిప్రాయాన్ని ఏర్పరుచుకోవాలని కోరారు. ట్రైలర్‌పై ప్రభాస్ స్పందించడం తమ టీమ్‌కు ఎంతో ధైర్యాన్ని ఇచ్చిందని తెలిపారు.
హీరోయిన్ నక్షత్ర మాట్లాడుతూ.. 2006 బ్యాక్‌డ్రాప్‌లో కథ సాగుతుందని, అయితే సినిమాలోని అంశాలు ప్రస్తుత తరంతో పాటు భవిష్యత్ తరాలకు కూడా కనెక్ట్ అవుతాయని అన్నారు. కుటుంబమంతా కలిసి చూడదగిన చిత్రంగా ‘తెల్లకాగితం’ ఉంటుందని చెప్పారు. ‘ఆశ’ అనే మంచి పాత్రను తనకు ఇచ్చిన దర్శకుడు రమేష్, నిర్మాత కృష్ణ, రచయిత నందుకు కృతజ్ఞతలు తెలిపారు. ఇది తన డెబ్యూ సినిమా కావడంతో మొదట్లో టెన్షన్ పడ్డానని, అయితే చిత్ర బృందం తనకు ఎంతో సహకరించిందని చెప్పారు.
దర్శకుడు రమేష్ బండ్రెడ్డి మాట్లాడుతూ.. నిర్మాత కృష్ణ తనపై పూర్తి నమ్మకంతో సినిమాకు అవసరమైన అన్ని వనరులను సమకూర్చారని అన్నారు. హీరో రోషన్ పాత్రలో పూర్తిగా లీనమై నటించాడని, హీరోయిన్ నక్షత్ర కూడా అద్భుతమైన నటన కనబరిచిందని ప్రశంసించారు. సినిమాలోని ఒక వీడియో ఆధారంగా వస్తున్న ప్రచారాన్ని పట్టించుకోవద్దని, పూర్తి సినిమా చూసిన తర్వాతే స్పందించాలని కోరారు. అక్టోబర్ 1న ప్రీమియర్స్‌తోనే సినిమా గురించి ప్రేక్షకులు మాట్లాడతారని, చివరి షాట్ వరకు సినిమా ఆసక్తికరంగా సాగుతుందని చెప్పారు.
దిల్ రాజు మాట్లాడుతూ.. ‘తెల్లకాగితం’ కథ తనకు 2000ల కాలం నాటి స్వచ్ఛమైన, అమాయకమైన ప్రేమకథను గుర్తు చేసిందన్నారు. కొత్త నటీనటులు ఉన్నప్పటికీ దర్శకుడు రమేష్ వారి నుంచి మంచి నటనను రాబట్టారని ప్రశంసించారు. సినిమాకు గుహన్ సినిమాటోగ్రఫీ, విజయ్ బుల్గానిన్ సంగీతం, కార్తీక్ శ్రీనివాస్ ఎడిటింగ్ వంటి అనుభవజ్ఞులైన సాంకేతిక నిపుణులు పనిచేశారని తెలిపారు. ప్రేక్షకులు సినిమా చూసి బయటకు వచ్చిన తర్వాత కూడా ఆలోచించేలా ఇందులో మంచి పాయింట్ ఉందని అన్నారు.
అనిల్ రావిపూడి మాట్లాడుతూ.. చిన్న వయసులో తెలిసీ తెలియక పిల్లలు చేసే తప్పులు, వాటిని తల్లిదండ్రులతో పంచుకోకుండా సమస్యలను మరింత పెంచుకునే పరిస్థితులను సినిమాలో బాధ్యతాయుతంగా చూపించారని అన్నారు. ఏ సమస్య వచ్చినా తల్లిదండ్రులు పిల్లలకు అండగా నిలుస్తారనే మంచి సందేశం ఇందులో ఉందని ప్రశంసించారు. రచయిత నందు కథను బాగా రాశారని, హీరో రోషన్ తన పాత్రకు సరిపోయే కథను ఎంచుకుని చక్కగా నటించాడని చెప్పారు. నటుడు అజయ్ సినిమాలో తండ్రి పాత్రలో ప్రత్యేకంగా ఆకట్టుకుంటారని పేర్కొన్నారు.
కొరటాల శివ మాట్లాడుతూ.. సినిమా చూసినప్పుడు యువ నటీనటుల్లో ఉన్న ప్రతిభ, తపన తనను ఆకట్టుకున్నాయని అన్నారు. దర్శకుడు రమేష్ కొత్త నటీనటుల నుంచి సహజమైన నటనను రాబట్టారని ప్రశంసించారు. ఎక్కడా కృత్రిమత్వం కనిపించకుండా సినిమాను సహజంగా తెరకెక్కించిన తీరు బాగుందని చెప్పారు. రోషన్, నక్షత్రల కెమిస్ట్రీ కూడా ఆకట్టుకుంటుందని, విజయ్ బుల్గానిన్ సంగీతం ప్రత్యేకంగా నిలుస్తుందని పేర్కొన్నారు.
చందు మొండేటి మాట్లాడుతూ.. ట్రైలర్‌లోని ఓ డైలాగ్ తనను ఎంతగానో ఆకట్టుకుందని, అందుకే సినిమా చూడాలనే ఆసక్తి కలిగిందని చెప్పారు. డెబ్యూ దర్శకుడు, అప్‌కమింగ్ హీరోతో సినిమా చేస్తున్నప్పటికీ నిర్మాత కృష్ణ మంచి క్యాస్టింగ్‌ను సమకూర్చారని ప్రశంసించారు. చిత్ర బృందానికి ముందుగానే శుభాకాంక్షలు తెలిపారు.
వశిష్ట కూడా నిర్మాత కృష్ణతో తనకున్న అనుబంధాన్ని గుర్తుచేసుకుంటూ చిత్ర బృందానికి శుభాకాంక్షలు తెలిపారు. రచయిత నందు, హీరో రోషన్, హీరోయిన్ నక్షత్రలతో పాటు దర్శకుడు రమేష్‌కు అభినందనలు చెప్పారు.
శైలేష్ కొలను మాట్లాడుతూ.. తాను షూటింగ్ సమయంలోనే సినిమా కంటెంట్‌ను చూశానని, అప్పుడే చాలా ప్రామిసింగ్‌గా అనిపించిందని చెప్పారు. హీరో రోషన్ నటన తనను ఆకట్టుకుందని, హీరోయిన్ నక్షత్ర కూడా మంచి అవకాశాలు ఉన్న నటిగా కనిపిస్తోందని అన్నారు. దర్శకుడు రమేష్ తన కెరీర్‌లో ఎంతో కష్టపడి ఈ స్థాయికి వచ్చారని ప్రశంసించారు. ‘తెల్లకాగితం’ ఒక ఫ్రెష్ లవ్ స్టోరీ, డ్రామాగా ప్రేక్షకులను ఆకట్టుకుంటుందని పేర్కొన్నారు.
బండ్ల గణేష్ మాట్లాడుతూ.. సోషల్ మీడియాలో వచ్చే ట్రోల్స్, నెగెటివిటీని పట్టించుకోకుండా ముందుకు సాగాలని దర్శకుడు రమేష్‌కు సూచించారు. నిర్మాత కృష్ణతో తనకు సుమారు 25 ఏళ్లుగా ఉన్న అనుబంధాన్ని గుర్తుచేసుకున్నారు. కృష్ణకు సినిమా అంటే ఎంతో ఇష్టమని, ఆయన నిబద్ధతకు ‘తెల్లకాగితం’ ఒక మంచి ఫలితంగా నిలవాలని ఆకాంక్షించారు.
రచయిత నందు సవిరిగాన మాట్లాడుతూ.. ‘తెల్లకాగితం’ సాధారణ ప్రేమకథ కాదని స్పష్టం చేశారు. తల్లిదండ్రుల ప్రేమ, కుటుంబ బంధాలు, పిల్లల కోసం త్యాగం చేసే కుటుంబ సభ్యుల భావోద్వేగాలను ఇందులో చూపించామని తెలిపారు. తల్లిదండ్రుల కోసం జీవించే కుటుంబ సభ్యులందరికీ ఈ సినిమాను అంకితం చేస్తున్నట్లు చెప్పారు. హీరో రోషన్, దర్శకుడు రమేష్ ఈ కథపై ఎంతో నమ్మకంతో పనిచేశారని అన్నారు.
