తెలంగాణ ప్రభుత్వం యాదాద్రి శ్రీ లక్ష్మీనరసింహ స్వామి దేవస్థానాన్ని కేవలం ఒక ప్రాంతీయ ఆలయంగా కాకుండా, దేశవ్యాప్తంగా తిరుమల తిరుపతి దేవస్థానం (టీటీడీ) స్థాయిలో గుర్తింపు పొందే మహాక్షేత్రంగా తీర్చిదిద్దాలని లక్ష్యంగా పెట్టుకుంది. ఆలయ పునర్నిర్మాణం పూర్తయిన తర్వాత ఇప్పుడు దృష్టి మొత్తం పరిపాలన, పారదర్శకత, భక్తుల సేవలు, ఆర్థిక నిర్వహణపై కేంద్రీకృతమైంది. ఈ నేపథ్యంలో ప్రభుత్వం పాత ట్రస్ట్ బోర్డును రద్దు చేసి కొత్త ట్రస్ట్ బోర్డును ఏర్పాటు చేయడం సాధారణ పరిపాలనా నిర్ణయం మాత్రమే కాదు, యాదాద్రి భవిష్యత్తును నిర్దేశించే కీలక అడుగుగా చెప్పవచ్చు.
కొత్త ట్రస్ట్ బోర్డు ఛైర్మన్గా ప్రముఖ పారిశ్రామికవేత్త ఎం. సత్యనారాయణ రెడ్డి (MSN గ్రూప్) నియమితులయ్యారు. సభ్యులుగా ఎమ్మెల్యే వినోద్ వెంకటస్వామి, సురేఖ కొణిదెల (చిరంజీవి సతీమణి), సి. విజయరాజం, తూళ్ల విజయేందర్, పి. ఈశ్వర్, గుండు మల్లయ్య, స్వాతి కంటమని, ఎం. రాఘవేంద్ర రావు, డి. లక్ష్మీనారాయణ నాయక్ తదితరులు నియమితులయ్యారు. వ్యాపారం, ప్రజాప్రతినిధులు, సామాజిక సేవ వంటి విభిన్న రంగాలకు చెందిన వ్యక్తులను నియమించడం ద్వారా ప్రభుత్వం సమతుల్యత కలిగిన బోర్డును ఏర్పాటు చేసినట్లుగా కనిపిస్తోంది.
అయితే ఈ నియామకాలలో అత్యధిక చర్చకు దారితీసింది సురేఖ కొణిదెల నియామకం. మెగాస్టార్ చిరంజీవి సతీమణి కావడం వల్ల ఈ నిర్ణయం వెంటనే రాజకీయ చర్చకు కేంద్రబిందువైంది. ఒక వర్గం దీనిని ప్రముఖ కుటుంబానికి ఇచ్చిన గౌరవంగా చూస్తే, మరో వర్గం తెలంగాణకు చెందిన ఆధ్యాత్మిక, సామాజిక ప్రముఖులకు అవకాశం ఇవ్వాల్సిందని ప్రశ్నిస్తోంది. ముఖ్యంగా తెలంగాణ భావజాలాన్ని బలంగా వినిపించే రాజకీయ వర్గాలు దీనిని భవిష్యత్తులో రాజకీయ అంశంగా మార్చే అవకాశాన్ని పూర్తిగా కొట్టిపారేయలేం.
అయితే మరో కోణం కూడా ఉంది. సురేఖ కొణిదెల ప్రత్యక్ష రాజకీయాల్లో చురుకుగా లేరు. ఆమె వ్యక్తిగతంగా వివాదాలకు దూరంగా ఉంటూ, సామాజిక కార్యక్రమాల్లో పాల్గొన్న సందర్భాలు ఉన్నాయి. ట్రస్ట్ బోర్డులో ఆమె ఒక్కరే నిర్ణయాలు తీసుకునే స్థితి లేదు. కాబట్టి ఆమె నియామకం ఒక్కటే యాదాద్రి నిర్వహణ ను ప్రభావితం చేస్తుందని చెప్పడానికి లేదు. అయినప్పటికీ తితిదే బోర్డు లో రాష్ట్రాలకు అతీతంగా నియమిస్తారు అనే కోణంలో కూడా చూడవచ్చు.
టీటీడీ స్థాయికి యాదాద్రిని తీసుకెళ్లాలంటే కేవలం ప్రముఖులను ట్రస్ట్ బోర్డులో నియమించడం సరిపోదు. తిరుమల విజయానికి అసలు కారణం పారదర్శక పరిపాలన, ఆర్థిక క్రమశిక్షణ, డిజిటల్ సేవలు, భక్తులకు నాణ్యమైన సౌకర్యాలు, శాశ్వత అభివృద్ధి ప్రణాళికలు ఇవి ముఖ్యమైనవి. యాదాద్రిలో కూడా అదే ప్రమాణాలు అమలైతేనే దేశవ్యాప్తంగా భక్తుల విశ్వాసాన్ని మరింతగా పొందగలదు. ప్రభుత్వం ఇప్పటికే యాదాద్రి ఆలయ భూముల విషయంలో టీటీడీ తరహా విధానాన్ని అమలు చేయాలని సంకేతాలు ఇచ్చింది. ఆలయ భూములు శాశ్వతంగా దేవస్థాన ప్రయోజనాలకే ఉపయోగపడేలా విధానాలు రూపొందించడం, కేటాయింపుల్లో పారదర్శకత పాటించడం, భవిష్యత్తులో వివాదాలకు తావులేకుండా వ్యవస్థను బలోపేతం చేయడం వంటి చర్యలు తీసుకుంటోంది. ఇవి అమలైతే యాదాద్రి పరిపాలనపై ప్రజల విశ్వాసం మరింత పెరిగే అవకాశం ఉంది.
యాదాద్రి ఇప్పటికే తెలంగాణలో అత్యంత వేగంగా అభివృద్ధి చెందిన ఆధ్యాత్మిక కేంద్రం. ప్రతి సంవత్సరం లక్షలాది మంది భక్తులు దర్శనానికి వస్తున్నారు. భవిష్యత్తులో ఈ సంఖ్య కోట్లకు చేరే అవకాశం ఉంది. అందుకు అనుగుణంగా రహదారులు, పార్కింగ్, వసతి గృహాలు, అన్నదానం, డిజిటల్ దర్శన వ్యవస్థ, పరిశుభ్రత, భద్రత వంటి అన్ని అంశాల్లో టీటీడీ స్థాయి ప్రమాణాలు తీసుకురావాల్సిన అవసరం ఉంది. ట్రస్ట్ బోర్డు ముందు ఉన్న అసలు సవాలు ఇదే. అదే సమయంలో, ట్రస్ట్ బోర్డు సభ్యుల ఎంపికలో రాజకీయ సమీకరణల కంటే సామర్థ్యం, నిజాయితీ, పరిపాలనా అనుభవం, దేవాలయ అభివృద్ధిపై నిబద్ధతకు ఎక్కువ ప్రాధాన్యం ఇస్తే యాదాద్రి మరింత వేగంగా ఎదుగుతుంది. భక్తులు సభ్యుల రాజకీయ నేపథ్యాన్ని కంటే, ఆలయంలో పొందే సేవల నాణ్యతను ఎక్కువగా గుర్తుంచుకుంటారు.
ముగింపు: తెలంగాణ ప్రభుత్వం ప్రతిష్టాత్మకంగా ఈ క్షేత్రాన్ని తీర్చిదిద్దుతుంది. దీని వెనుక ఆధ్యాత్మిక కోణం ఒకటే కాదు, అభివృద్ధి, టూరిజం, ఇలా చాలా ప్రయోజనాలు ఉన్నాయని, ” పుణ్యస్థలం యాదాద్రిని టీటీడీ స్థాయిలో దేశవ్యాప్త ఆధ్యాత్మిక కేంద్రంగా తీర్చిదిద్దే దీర్ఘకాలిక వ్యూహం” కూడా ఉంది అని ఆర్థిక నిపుణులు అంటున్నారు. హైదరాబాద్ నుండి 60 కిలోమీటర్ల దూరంలో ఈ ఆలయం ఉండటం వలన ప్రతి శనివారం, ఆదివారం లలో 50 వేల మందికి మించి దర్శించుకుంటున్నారు. పటిష్టమైన పరిపాలనా వ్యవస్థ, భక్తి, క్రమశిక్షణ, పారదర్శకత తో, యాదాద్రి కూడా, భవిష్యత్తులో తిరుమల తర్వాత దేశంలో అత్యంత ప్రభావవంతమైన వైష్ణవ క్షేత్రంగా అవతరించే సామర్థ్యం ఉంది.
