సంగీత సంచలనం, రాక్స్టార్ అనిరుధ్ రవిచందర్ తన కెరీర్లో మరో కొత్త అధ్యాయానికి శ్రీకారం చుట్టారు. తన సొంత ఇండిపెండెంట్ లేబుల్ అల్బుకర్కీ రికార్డ్స్ ద్వారా, యూనివర్సల్ మ్యూజిక్ ఇండియాతో కలిసి రూపొందించిన తొలి పాట ‘అరవింద్’ను విడుదల చేశారు. తెలుగు, తమిళ భాషల్లో రూపొందిన ఈ ఒరిజినల్ ట్రాక్తో అనిరుధ్ సినిమా సంగీతానికి అతీతంగా స్వతంత్ర సంగీత ప్రపంచంలో తన ముద్ర వేయడానికి అడుగుపెట్టారు.
2012లో విడుదలైన ‘వై దిస్ కొలవెరి డి’ పాటతో దేశవ్యాప్తంగా సంచలనం సృష్టించిన అనిరుధ్, ఆ తర్వాత జైలర్, విక్రమ్, లియో, కూలీ, దేవర పార్ట్ 1 వంటి భారీ చిత్రాలకు సంగీతం అందించి అగ్రశ్రేణి సంగీత దర్శకుడిగా ఎదిగారు. అలాగే జవాన్ చిత్రంతో బాలీవుడ్లోనూ తన ప్రతిభను చాటుకున్నారు.
ఇప్పుడు ‘అరవింద్’ రూపంలో ఆయన పూర్తిగా భిన్నమైన కథను ప్రేక్షకుల ముందుకు తీసుకొచ్చారు. నేటి డిజిటల్ యుగంలో స్వతంత్ర కళాకారులు ఎదుర్కొనే సవాళ్లు, అవకాశాలు, నిరాశలు, ఆశలు అన్నింటినీ ఈ పాట ద్వారా ప్రతిబింబించారు.
ఈ పాటలోని అరవింద్ పాత్ర అనిరుధ్కి ప్రతిరూపంలా ఉంటుంది. సంగీతంపై అపారమైన ప్రేమతో, ఎన్నో అడ్డంకులు ఎదురైనా తన కలలను వదులుకోకుండా ముందుకు సాగే యువ సంగీతకారుడి కథ ఇది. నేటి కాలంలో సంగీతాన్ని విడుదల చేయడం సులభమైనా, ఇండిపెండెంట్ ఆర్టిస్టుగా గుర్తింపు పొందడం, నిలదొక్కుకోవడం మాత్రం ఎంత కష్టమో ఈ పాట చెబుతుంది.
ఈ సందర్భంగా అనిరుధ్ మాట్లాడుతూ, “అరవింద్ అనేది ప్రతి ఒక్కరిలోనూ ఉండే వ్యక్తిత్వం. మనలో చాలామంది జీవితంలో ఎప్పుడో ఒకప్పుడు తమ ప్రతిభను నిరూపించుకునేందుకు ఒక అవకాశం కోసం ఎదురుచూసే పరిస్థితిని ఎదుర్కొంటారు. ఈ పాట అలాంటి ఒక స్వతంత్ర కళాకారుడి కథ. అలాగే నేటి డిజిటల్ ప్రపంచంలో కంటెంట్ సముద్రంలో గుర్తింపు కోసం పోరాడే ఆర్టిస్టుల సవాళ్లపై ఇది ఒక వ్యంగ్యాత్మక వ్యాఖ్య కూడా” అని తెలిపారు.
అనిరుధ్కు ఈ ప్రాజెక్ట్ ప్రత్యేకమైనదిగా నిలిచింది. ఎందుకంటే తన కెరీర్ ప్రారంభ దశలో తాను కూడా ‘అరవింద్’ లాంటి పరిస్థితులనే ఎదుర్కొన్నానని ఆయన చెబుతున్నారు. అందుకే ఈ పాట ద్వారా తనలాంటి ప్రయాణంలో ఉన్న కళాకారులు, క్రియేటివ్ వ్యక్తులతో భావోద్వేగ అనుబంధం ఏర్పరచుకోవాలని ఆశిస్తున్నారు.
ఇక అల్బుకర్కీ రికార్డ్స్ ద్వారా రాబోయే రోజుల్లో పలు వినూత్నమైన ఇండిపెండెంట్ మ్యూజిక్ ప్రాజెక్ట్స్, కాన్సెప్ట్ ఆధారిత ఆల్బమ్స్ను ప్రేక్షకుల ముందుకు తీసుకురావడానికి అనిరుధ్ సిద్ధమవుతున్నారు.
సంగీతం ద్వారా ఒక కళాకారుడి అంతర్మథనాన్ని, పోరాటాన్ని, ఆశయాన్ని ప్రతిబింబించిన ‘అరవింద్’ అనిరుధ్ కెరీర్లో మరో ప్రత్యేక మైలురాయిగా నిలవనుంది.
