యువ సామ్రాట్ నాగచైతన్య నటిస్తున్న ప్రతిష్ఠాత్మక చిత్రం ‘వృషకర్మ’పై రోజురోజుకీ అంచనాలు పెరుగుతున్నాయి. కార్తీక్ దండు దర్శకత్వంలో మైథలాజికల్ థ్రిల్లర్‌గా తెరకెక్కుతున్న ఈ సినిమా డిసెంబర్ 4న ప్రపంచవ్యాప్తంగా థియేటర్లలో విడుదల కానుంది. ఎస్‌వీసీసీ, సుకుమార్ రైటింగ్స్ బ్యానర్లపై రూపొందుతున్న ఈ చిత్రాన్ని బాపినీడు సమర్పిస్తున్నారు.
తాజాగా ఈ సినిమాకు సంబంధించి మేకర్స్ మరో ఆసక్తికరమైన అప్‌డేట్ ఇచ్చారు. ‘వృషకర్మ’ మ్యూజికల్ ప్రమోషన్స్‌కు శ్రీకారం చుడుతూ తొలి పాట విడుదల తేదీని ప్రకటించారు. ‘స్వాగ్ ఆఫ్ అర్జున్’ పేరుతో రూపొందిన ఫస్ట్ సింగిల్‌ను నవంబర్ 7న విడుదల చేయనున్నారు.
అర్జున్‌గా నాగచైతన్య స్టైలిష్ అవతార్!
పాట అనౌన్స్‌మెంట్ సందర్భంగా విడుదల చేసిన పోస్టర్ ప్రత్యేక ఆకర్షణగా నిలుస్తోంది. ఇందులో నాగచైతన్య బ్లాక్ గాగుల్స్, ఇయర్‌ఫోన్స్‌తో సరికొత్త లుక్‌లో కనిపిస్తున్నారు. భుజంపై గాయం, ఇంటెన్స్ సైడ్ ప్రొఫైల్, డార్క్ బ్యాక్‌డ్రాప్‌తో పోస్టర్‌కు రఫ్ అండ్ రగ్గడ్ అప్పీల్ తీసుకొచ్చారు. అర్జున్ పాత్రలోని స్వాగ్, అటిట్యూడ్‌ను ప్రతిబింబించేలా ఈ పోస్టర్‌ను డిజైన్ చేశారు. దీంతో ఫస్ట్ సింగిల్ ఎలా ఉండబోతోందనే ఆసక్తి మొదలైంది.
నాగచైతన్య కెరీర్‌లోనే భారీ ప్రాజెక్ట్!
‘వృషకర్మ’ నాగచైతన్య కెరీర్‌లోనే అత్యధిక బడ్జెట్‌తో రూపొందుతున్న సినిమా. అంతేకాదు, ఆయన కెరీర్‌లోనే అత్యధిక ప్రీ-రిలీజ్ బిజినెస్ సాధించిన చిత్రంగా కూడా వార్తల్లో నిలుస్తోంది. ఇప్పటికే విడుదలైన ప్రచార చిత్రాలు సినిమాపై మంచి బజ్‌ను క్రియేట్ చేశాయి.
ఈ చిత్రంలో నాగచైతన్యకు జోడీగా మీనాక్షి చౌదరి నటిస్తుండగా, స్పర్శ్ శ్రీవాస్తవ ప్రతినాయకుడి పాత్రలో కనిపించనున్నారు.
సాంకేతిక విభాగంలో రగుల్ డి హెరియన్ సినిమాటోగ్రఫీ అందిస్తుండగా, అజనీష్ బి. లోక్‌నాథ్ సంగీతం సమకూరుస్తున్నారు. శ్రీ నాగేంద్ర తంగాల ప్రొడక్షన్ డిజైనర్‌గా వ్యవహరిస్తుండగా, నవీన్ నూలి ఎడిటింగ్ బాధ్యతలు చేపట్టారు.
మైథలాజికల్ అంశాలకు థ్రిల్లింగ్ కథనాన్ని జోడించి తెరకెక్కిస్తున్న ‘వృషకర్మ’పై ట్రేడ్ వర్గాల్లోనూ ఆసక్తి నెలకొంది. నవంబర్ 7న విడుదల కానున్న ‘స్వాగ్ ఆఫ్ అర్జున్’ పాటతో సినిమా మ్యూజికల్ ప్రమోషన్స్ మరింత జోరందుకోనున్నాయి. డిసెంబర్ 4న ఈ చిత్రం ప్రేక్షకుల ముందుకు రానుంది.
