2018లో యూత్‌ను విశేషంగా ఆకట్టుకున్న ‘హుషారు’ చిత్రానికి సీక్వెల్‌గా తెరకెక్కుతున్న ‘హుషారు 2’ టీజర్ విడుదలైంది. దర్శకుడు శ్రీహర్ష కొనుగంటి ఈసారి మరింత భిన్నమైన కథాంశంతో ప్రేక్షకుల ముందుకు వస్తున్నారు. యాక్షన్, కామెడీ, అడ్వెంచర్ అంశాలతో రూపొందిన ఈ టీజర్ ఆసక్తిని పెంచుతోంది. ముఖ్యంగా పీపుల్స్ స్టార్ ఆర్. నారాయణమూర్తి పవర్‌ఫుల్ ఎంట్రీ టీజర్‌కు ప్రత్యేక ఆకర్షణగా నిలిచింది.
‘‘ప్రతి గడపకు ఓ కథ ఉంటుందంటారు.. కానీ ఈ చిత్రగుంజ్‌లో ప్రతి గడపకు ఒకే కథ.. అందరి ఇంటి పేరు ఒక్కటే భయం. ఒకవైపు రక్తంతో రాజ్యాన్ని పరిపాలించే రాక్షసుడు.. మరోవైపు అడవిలో క్రూరంగా వేటాడే సాయుధులు.. వీళ్ల మధ్య నలిగిపోతున్న ప్రజలు ఒక నాయకుడి కోసం ఎదురుచూస్తున్నారు. ఎవరా నాయకుడు?’’ అనే గంభీరమైన డైలాగ్‌తో టీజర్ ప్రారంభమవుతుంది.
దీంతో ‘హుషారు 2’ సీరియస్ యాక్షన్ డ్రామానా అనే ఆసక్తి కలుగుతుంది. అయితే, వెంటనే రాహుల్ రామకృష్ణ ఎంట్రీ ఇచ్చి.. ‘‘అరే చంద్ర‌మోహ‌న్ ఆపు.. నీ స్టోరీకి, ఎమోష‌న్స్‌కి ఏమైనా సంబంధం ఉందా? టోటల్ డిస్‌కనెక్ట్’’ అంటూ చెప్పడంతో సీన్ ఒక్కసారిగా మారిపోతుంది. ఈ సన్నివేశం సినిమాలో కామెడీకి కూడా పెద్దపీట వేసినట్లు తెలియజేస్తోంది.
చిత్రగుంజ్‌లో కుర్రాళ్లకు ఎదురైన కష్టాలు!
‘బాయ్స్ ఆర్ బ్యాక్’ అనే క్యాప్షన్‌తో మొదలయ్యే టీజర్‌లో రాహుల్ రామకృష్ణ తన నలుగురు స్నేహితులతో కలిసి ఓ క్రేజీ ఐడియాను నిజం చేసుకోవడానికి చిత్రగుంజ్‌కు వెళ్తాడు. అక్కడికి చేరుకున్న తర్వాత వారి ప్రయాణం అనూహ్యమైన మలుపులు తిరుగుతుంది. ఒకవైపు విలన్లు ఈ కుర్రాళ్లను చంపేందుకు ప్రయత్నిస్తుంటే, మరోవైపు వారి నుంచి తప్పించుకోవడానికి గ్యాంగ్ నానా తంటాలు పడుతుంది.
ఈ క్రమంలో వారి ప్రయాణం మరింత ప్రమాదకరంగా మారుతుంది. చివరకు వారు నక్సలైట్ల చేతికి చిక్కడం కథలో కీలక మలుపుగా కనిపిస్తోంది. అసలు ఈ కుర్రాళ్లను విలన్లు ఎందుకు చంపాలనుకుంటున్నారు? చిత్రగుంజ్‌లో వారికి ఎదురైన సమస్యలేంటి? అనే ప్రశ్నలను టీజర్ ఆసక్తికరంగా రేకెత్తిస్తోంది.
పీపుల్స్ స్టార్ ఆర్. నారాయణమూర్తి పవర్‌ఫుల్ ఎంట్రీ
టీజర్ చివర్లో నక్సలైట్ల నాయకుడిగా పీపుల్స్ స్టార్ ఆర్. నారాయణమూర్తిని పరిచయం చేశారు. ‘‘తమ్ముళ్లు.. వేట మొదలెడదామా!’’ అంటూ ఆయన చెప్పిన పవర్‌ఫుల్ డైలాగ్‌తో టీజర్ ముగుస్తుంది. ఆయన పాత్రను పరిచయం చేసిన తీరు ప్రేక్షకుల్లో ఆసక్తిని పెంచుతోంది.
మొత్తంగా చూస్తే, ‘హుషారు 2’లో యువతకు నచ్చే కామెడీతో పాటు ఉత్కంఠభరితమైన యాక్షన్ సన్నివేశాలు కూడా ఉండనున్నట్లు టీజర్ స్పష్టం చేస్తోంది. ఒరిజినల్ చిత్రంలోని స్నేహం, సరదా, యూత్‌ఫుల్ ఎంటర్‌టైన్‌మెంట్‌ను కొనసాగిస్తూనే ఈసారి కథను కొత్త నేపథ్యంలో నడిపిస్తున్నట్లు తెలుస్తోంది.
2018లో విడుదలైన ‘హుషారు’ యువ ప్రేక్షకుల్లో మంచి క్రేజ్‌ను సంపాదించుకుంది. ఇప్పుడు అదే ఉత్సాహంతో దర్శకుడు శ్రీహర్ష కొనుగంటి సీక్వెల్‌ను సిద్ధం చేస్తున్నారు.
ఈ చిత్రంలో రాహుల్ రామకృష్ణతో పాటు పలువురు నటీనటులు కీలక పాత్రల్లో కనిపించనున్నారు. ప్రస్తుతం సినిమా పోస్ట్ ప్రొడక్షన్ పనులు వేగంగా జరుగుతున్నాయి. త్వరలోనే చిత్రాన్ని ప్రేక్షకుల ముందుకు తీసుకురావడానికి మేకర్స్ సన్నాహాలు చేస్తున్నారు.
టీజర్‌లో కామెడీ, యాక్షన్, సస్పెన్స్‌ను మేళవించిన తీరు ఆసక్తిని పెంచుతుండగా, ఆర్. నారాయణమూర్తి ఎంట్రీ సినిమాపై అంచనాలను మరింత పెంచుతోంది.
