చిన్న సినిమాగా విడుదలైన ‘లిటిల్ హార్ట్స్’ ఊహించని స్థాయిలో విజయాన్ని అందుకుంది. ఈ విజయంతో హీరో మౌళి తనూజ్ ఒక్కసారిగా ఇండస్ట్రీలో హాట్ టాపిక్‌గా మారిపోయాడు. మొదట్లో చిన్న బడ్జెట్ సినిమాలతో కెరీర్ మొదలుపెట్టిన మౌళి, ఈ సినిమాతో స్టార్ లీగ్‌లోకి అడుగుపెట్టాడని చెప్పాలి.
సినిమా బ్లాక్‌బస్టర్ అయిన వెంటనే, మైత్రీ మూవీ మేకర్స్ సంస్థ మౌళిని తమ బ్యానర్ కింద లాక్ చేసిందని, అదీ ఏకంగా కోటి రూపాయల అడ్వాన్స్ ఇచ్చిందని వార్తలు సోషల్ మీడియాలో వైరల్ అయ్యాయి. ఒక్కసారిగా రెండో సినిమాకే ఈ స్థాయిలో రెమ్యునరేషన్ అన్న వార్త చూసి సినీ ప్రియులు ఆశ్చర్యపోయారు.
‘లిటిల్ హార్ట్స్’ కోసం మౌళి తీసుకున్న పారితోషికం కేవలం 5 నుంచి 10 లక్షల రూపాయల మధ్య మాత్రమేనని టాక్. కానీ ఒక్క హిట్‌తోనే అతని రెమ్యునరేషన్ పదింతలు పెరిగిందన్న రూమర్ ట్రేడ్ సర్కిల్స్‌లో పెద్ద చర్చకు దారితీసింది. ఈ వార్తలు అంత వేగంగా వ్యాపించడంతో, అభిమానుల మధ్య కూడా మౌళి మార్కెట్ మీద పెద్ద చర్చ నడిచింది.
అయితే, ఈ వార్తల్లో నిజం లేదని ఇటీవల మైత్రీ మూవీ మేకర్స్ నిర్మాతలు నవీన్ యెర్నేని మరియు రవి శంకర్ క్లారిటీ ఇచ్చారు. తమ కొత్త సినిమా ప్రమోషన్ సందర్భంగా మాట్లాడుతూ వారు స్పందిస్తూ, “మౌళి ప్రతిభపై తమకు విశ్వాసం ఉందని, మేము హీరో మౌళితో పాటు దర్శకుడికీ కూడా అడ్వాన్స్ ఇచ్చాం. కానీ మౌళికి కోటి రూపాయల అడ్వాన్స్ ఇచ్చామనే వార్త పూర్తిగా ఫేక్ న్యూస్,” అని ఖండించారు.
ఈ ప్రకటనతో మౌళి రెమ్యునరేషన్ గురించి వస్తున్న గాసిప్స్‌కు ఒక్కసారిగా చెక్ పడింది. అయినప్పటికీ, ‘లిటిల్ హార్ట్స్’ విజయం మౌళి కెరీర్‌ను కొత్త దిశలోకి తీసుకెళ్లిందనడంలో ఎలాంటి సందేహం లేదు. ప్రస్తుతం ఆయనకు అనేక ఆఫర్లు వస్తున్నాయని ఇండస్ట్రీ వర్గాలు చెబుతున్నాయి.
