విక్టరీ వెంకటేష్ – మాటల మాంత్రికుడు త్రివిక్రమ్ శ్రీనివాస్ క్రేజీ కాంబినేషన్‌లో తెరకెక్కుతున్న ఫ్యామిలీ ఎంటర్‌టైనర్ ‘ఆదర్శ కుటుంబం’. అక్టోబర్ 9న థియేటర్లలోకి రావాల్సిన ఈ సినిమా విడుదల ఆకస్మికంగా వాయిదా పడటంపై నిర్మాత సూర్యదేవర నాగవంశీ మీడియా సమావేశంలో స్పష్టత ఇచ్చారు. రిలీజ్ వాయిదా పడటానికి గల అసలు కారణాలను వివరిస్తూ, అభిమానులకు క్షమాపణలు తెలిపారు.
పోస్ట్‌పోన్‌కు అసలు కారణమిదే
నాలుగు రోజుల క్రితం వరకు అక్టోబర్ 9నే విడుదల చేయాలని గట్టిగా ప్లాన్ చేశామని, యూఎస్ బుకింగ్స్ కూడా తెరిపించామని నాగవంశీ తెలిపారు. అయితే:
- పోస్ట్-ప్రొడక్షన్ పనుల్లో 4 నుంచి 5 రోజుల లాగ్ ఏర్పడింది.
- ఆదివారం నాటికి ఓవర్సీస్ సెన్సార్ కాపీ కూడా పంపించలేని క్లిష్ట పరిస్థితి ఏర్పడింది.
- హడావిడిగా రిలీజ్ చేస్తే శుక్రవారం ఉదయం ప్రేక్షకులతో పాటే నిర్మాతలు కూడా థియేటర్‌లో మొదటిసారి కాపీ చూడాల్సిన రిస్క్ ఉందని, అందుకే రిలీజ్ హోల్డ్ చేశామని వెల్లడించారు.
చిన్న సినిమాలకు, ఫ్యాన్స్‌కు క్షమాపణలు:
“చివరి నిమిషంలో రిలీజ్ ఆపడం ప్రొఫెషనల్‌గా కరెక్ట్ కాదని నాకు తెలుసు. దీనివల్ల కొన్ని చిన్న, మిడ్-రేంజ్ సినిమాలు ఇబ్బంది పడ్డాయి. అలాగే ఎంతో ఆశగా ఎదురుచూసిన వెంకటేష్ గారి ఫ్యాన్స్ కూడా నిరాశ చెందారు. అందుకు మనస్ఫూర్తిగా క్షమాపణలు చెబుతున్నాను” అని నాగవంశీ అన్నారు.
కాలర్ ఎగరేసుకునే సినిమా ఇస్తాం:
“ఒకవేళ అక్టోబర్ 9న సినిమాను బలవంతంగా తీసుకొచ్చి ఉంటే 80% క్వాలిటీతోనే వచ్చేది. ఇప్పుడు మరో రెండు మూడు వారాల సమయం దొరికింది కాబట్టి మిగిలిన రెండు పాటలు, ట్రైలర్ కట్, రీ-రికార్డింగ్ పనులను పక్కాగా పూర్తి చేస్తాం. ఎప్పుడు రిలీజ్ అయినా వెంకటేష్ గారి అభిమానులు కాలర్ ఎగరేసుకుని గర్వపడేలా 100% బెస్ట్ అవుట్‌పుట్‌తో ఈ సినిమాను అందిస్తాం” అని ఆయన హామీ ఇచ్చారు.
కొత్త రిలీజ్ డేట్ ఎప్పుడు?
సోషల్ మీడియాలో వినిపిస్తున్నట్లుగా అక్టోబర్ 30 లేదా నవంబర్ 6 డేట్లు ఇంకా ఖరారు కాలేదని తెలిపారు. ప్రస్తుతం వెంకటేష్ లండన్ పర్యటనలో ఉన్నారని, ఆయన హైదరాబాద్ రాగానే డి. సురేష్ బాబు గారితో కలిసి చర్చించి, పూర్తి స్థాయి కాపీ సిద్ధమైన తర్వాతే అధికారికంగా కొత్త రిలీజ్ తేదీని ప్రకటిస్తామని స్పష్టం చేశారు.
