కీర్తి సురేష్ తన కెరీర్‌లో హీరోయిన్ పాత్రలతో పాటు, కథను నడిపించే లీడ్ రోల్స్‌లోనూ ధైర్యంగా ప్రయోగాలు చేస్తూ ముందుకు వెళ్తున్నారు. అలాంటి ప్రయత్నాల్లో భాగంగా ఆమె ప్రధాన పాత్రలో తెరకెక్కిన క్రైమ్ కామెడీ చిత్రం రివాల్వర్ రీటా ఇప్పుడు థియేటర్ల తర్వాత ఓటిటి వేదికపైకి అడుగుపెట్టింది. విభిన్నమైన కథాంశంతో రూపొందిన ఈ సినిమా ఇప్పుడు డిజిటల్ ప్రేక్షకుల దృష్టిని ఆకర్షించేందుకు సిద్ధమైంది.
నిజానికి ఎప్పుడో విడుదల కావాల్సిన ఈ సినిమా పలు కారణాల వల్ల ఆలస్యమై, గత నెలాఖరున థియేటర్లలోకి వచ్చింది. కంటెంట్‌పై మిశ్రమ స్పందన రావడంతో పాటు ప్రాజెక్ట్ ఆలస్యం కావడం వల్ల ప్రేక్షకుల్లో పెద్దగా ఆసక్తి రాలేదు. అయితే ఇప్పుడు ఓటిటి ప్లాట్‌ఫామ్‌లో విడుదల కావడంతో సినిమాకు కొత్త ప్రేక్షక వర్గం లభించే అవకాశముందని భావిస్తున్నారు.
తాజా సమాచారం ప్రకారం, Netflix ఈ సినిమా డిజిటల్ హక్కులను సొంతం చేసుకుంది. ఇవాళ్టి నుంచే ‘రివాల్వర్ రీటా’ నెట్‌ఫ్లిక్స్‌లో స్ట్రీమింగ్‌కు అందుబాటులోకి వచ్చింది. థియేటర్లలో మిస్ అయినవారు లేదా మరోసారి చూడాలనుకునే వారు ఇప్పుడు సులభంగా ఓటిటిలో ఆస్వాదించవచ్చు.
ఈ చిత్రానికి జేకే చంద్రు దర్శకత్వం వహించగా, సదన్ సుందరం, జగదీష్ పళనిసామి నిర్మించారు. థియేట్రికల్ రిజల్ట్ ఎలా ఉన్నా, ఓటిటి వేదికపై ‘రివాల్వర్ రీటా’కు కొత్త లైఫ్ దొరుకుతుందేమో చూడాలి. కీర్తి సురేష్ అభిమానులకు మాత్రం ఇది ఖచ్చితంగా ఓటిటి స్పెషల్ ట్రీట్‌గా నిలవనుంది.
