మెగాస్టార్ కొత్త సినిమా టైటిల్ వచ్చేసింది.. ‘కాకా’గా చిరంజీవి.. రిలీజ్ డేట్ కూడా ఫిక్స్!

మెగాస్టార్ చిరంజీవి అభిమానులకు పుట్టినరోజు సందర్భంగా అదిరిపోయే సర్‌ప్రైజ్ ఇచ్చారు. ‘వాల్తేరు వీరయ్య’ తర్వాత దర్శకుడు బాబీ కొల్లి, చిరంజీవి మరోసారి కలిసి చేస్తున్న సినిమాకు టైటిల్‌ను అధికారికంగా ప్రకటించారు. ఈ చిత్రానికి ‘కాకా’ అనే ఆసక్తికరమైన టైటిల్‌ను ఖరారు చేశారు. టైటిల్ గ్లింప్స్‌తో పాటు సినిమా విడుదల తేదీని కూడా మేకర్స్ వెల్లడించారు.

నీళ్ల మధ్యలో మెగాస్టార్..

విడుదలైన గ్లింప్స్‌లో చిరంజీవి పాత్రను ఆసక్తికరంగా పరిచయం చేశారు. ఈ సినిమాలో ఆయన కె. సత్యం అనే పాత్రలో కనిపించనున్నారు. ఆక్వా ఇండస్ట్రీలో సూపర్‌వైజర్‌గా పనిచేసే వ్యక్తిగా మెగాస్టార్ పాత్రను డిజైన్ చేసినట్లు గ్లింప్స్ చూస్తే అర్థమవుతోంది.

గెటప్ శ్రీను.. సత్యంతో తన కూతురు స్కూటీ తాళాలు ఇచ్చిందని చెప్పే సన్నివేశంతో గ్లింప్స్ మొదలవుతుంది. ఆ కీని విసిరేయమని చిరంజీవి చెప్పగా.. అది అనుకోకుండా నీళ్లలో పడిపోతుంది. దీంతో సత్యం నీళ్లలోకి దిగి ఆ కీచైన్‌ను బయటకు తీసుకొస్తాడు.

‘లవ్ యూ డాడ్’.. ఎమోషనల్ టచ్

నీళ్లలో నుంచి తీసిన కీచైన్‌కు ‘Love You Dad’ అనే పదాలు ఉండటం ఆసక్తిని పెంచుతోంది. ఈ ఒక్క సీన్‌తోనే సినిమాలో తండ్రి, కూతురు మధ్య ఉండే అనుబంధానికి ఎంతటి ప్రాధాన్యం ఉందో మేకర్స్ హింట్ ఇచ్చారు.

మాస్, యాక్షన్ ఎలిమెంట్స్‌తో పాటు ఫ్యామిలీ ఎమోషన్ కూడా సినిమాలో కీలకంగా ఉండబోతున్నట్లు తెలుస్తోంది. చిరంజీవి పాత్రను దర్శకుడు బాబీ కొల్లి మరోసారి తనదైన స్టైల్‌లో డిజైన్ చేసినట్లు గ్లింప్స్‌తో స్పష్టమవుతోంది.

టైటిల్‌కు తగ్గట్టే అదిరిపోయే బీజీఎం

‘కాకా’ అనే టైటిల్ చాలా క్యాచీగా ఉండగా.. ఎస్. థమన్ అందించిన బ్యాక్‌గ్రౌండ్ స్కోర్ గ్లింప్స్‌కు మరింత హైప్ తీసుకొచ్చింది. ముఖ్యంగా చిరంజీవి నటించిన బ్లాక్‌బస్టర్ ‘గ్యాంగ్ లీడర్’ సినిమాలోని పాపులర్ పాటను బ్యాక్‌గ్రౌండ్‌లో ఉపయోగించడం మెగా అభిమానులను ఆకట్టుకునే అంశంగా మారింది.

చిరంజీవి కూతురిగా అనస్వర రాజన్

ఈ సినిమాలో అనస్వర రాజన్ చిరంజీవి కూతురి పాత్రలో కనిపించనున్నారు. నివేదా పేతురాజ్ మరో కీలక హీరోయిన్‌గా నటిస్తున్నారు. మిగిలిన నటీనటులు, కథకు సంబంధించిన మరిన్ని వివరాలను త్వరలోనే వెల్లడించే అవకాశం ఉంది.

‘వాల్తేరు వీరయ్య’ తర్వాత చిరంజీవి, బాబీ కొల్లి కాంబినేషన్‌పై ఇప్పటికే భారీ అంచనాలు ఉన్నాయి. ఇప్పుడు ‘కాకా’ గ్లింప్స్ ఆ అంచనాలను మరింత పెంచింది.

సంక్రాంతి బరిలో మెగాస్టార్

కె.వి.ఎన్. ప్రొడక్షన్స్ బ్యానర్‌పై వెంకట్ కె. నారాయణ నిర్మిస్తున్న ఈ సినిమా 2027 సంక్రాంతి కానుకగా జనవరి 13న ప్రేక్షకుల ముందుకు రానుంది. దీంతో వచ్చే సంక్రాంతి బరిలో మెగాస్టార్ సినిమా మరోసారి సందడి చేయనుంది.

టైటిల్, గ్లింప్స్‌తోనే సినిమాపై ఆసక్తిని పెంచిన ‘కాకా’.. పూర్తి స్థాయిలో ఎలాంటి అనుభూతిని అందించబోతుందో చూడాలి.