హీరోగా వరుస సినిమాలతో బిజీగా ఉన్న రామ్ పోతినేని ఇప్పుడు దర్శకుడిగానూ తన సత్తా చాటేందుకు సిద్ధమవుతున్నారు. ఆయన తొలిసారి మెగాఫోన్ పట్టిన ‘RaPo23’ ప్రస్తుతం భారీ స్థాయిలో తెరకెక్కుతోంది. ఈ ప్రాజెక్ట్ విషయంలో రామ్ చూపిస్తున్న డెడికేషన్ ఇప్పుడు టాక్ ఆఫ్ ది ఇండస్ట్రీగా మారుతోంది.
సినిమా షూటింగ్లో భాగంగా పాండిచ్చేరి శివార్లలో రామ్ ఏకంగా 24 గంటల పాటు నాన్స్టాప్ షూట్ చేసినట్లు సమాచారం. ఈ షెడ్యూల్లో రామ్ హీరోగా నటించడంతో పాటు దర్శకుడిగా మొత్తం షూటింగ్ను పర్యవేక్షించారు. ఒకేసారి రెండు బాధ్యతలు నిర్వర్తిస్తూ ఇంత సుదీర్ఘంగా షూటింగ్ చేయడం అంత సులభమైన విషయం కాదని చిత్ర యూనిట్ వర్గాలు చెబుతున్నాయి.
‘RaPo23’ కోసం పాండిచ్చేరిలో భారీ సెటప్ను సిద్ధం చేశారు. దాదాపు తొమ్మిది రోజుల పాటు అక్కడ షూటింగ్ కొనసాగినట్లు తెలుస్తోంది. సినిమాలో కీలకమైన సన్నివేశాలను ఈ భారీ సెటప్పై చిత్రీకరించినట్లు సమాచారం. నటుడిగా తన సన్నివేశాలను పూర్తి చేసుకుంటూనే.. దర్శకుడిగా ప్రతి షాట్, పెర్ఫార్మెన్స్, టెక్నికల్ అంశాన్ని రామ్ దగ్గరుండి చూసుకున్నట్లు తెలుస్తోంది.
అయితే పాండిచ్చేరి షెడ్యూల్కు వర్షాలు బ్రేక్ వేశాయి. అనూహ్యంగా వాతావరణం మారడంతో షూటింగ్ను తాత్కాలికంగా నిలిపివేసి చిత్రబృందం హైదరాబాద్కు తిరిగి వచ్చినట్లు సమాచారం. మిగిలిన షూటింగ్ను పూర్తి చేసేందుకు త్వరలోనే మరోసారి పాండిచ్చేరికి వెళ్లనున్నారని తెలుస్తోంది.
ఇక ‘RaPo23’ కథాంశం కూడా ఆసక్తికరంగానే ఉండబోతోంది. ఈ చిత్రాన్ని సైకలాజికల్ యాక్షన్ థ్రిల్లర్గా తెరకెక్కిస్తున్నారు. డార్క్ నియో-నోయర్ బ్యాక్డ్రాప్లో కథ సాగనుండటంతో రామ్ నుంచి ఇంతకుముందెన్నడూ చూడని కొత్త తరహా సినిమాను ప్రేక్షకులు చూడబోతున్నారనే ఆసక్తి ఏర్పడింది.
ఈ ప్రాజెక్ట్కు టెక్నికల్ టీమ్ కూడా ప్రత్యేక ఆకర్షణగా నిలుస్తోంది. నేషనల్ అవార్డు విజేత సినిమాటోగ్రాఫర్ తిరునావుక్కరసు (తిర్రు) కెమెరా బాధ్యతలు చేపట్టారు. సినిమాకు డార్క్, ఇంటెన్స్ విజువల్ టోన్ తీసుకురావడంలో ఆయన కీలక పాత్ర పోషిస్తున్నారు.
యాక్షన్ విభాగంలో విక్రమ్ మోర్, పీటర్ హెయిన్ కలిసి పనిచేస్తున్నారు. భారీ యాక్షన్ సీక్వెన్సులను డిజైన్ చేయడంతో పాటు సినిమాకు ప్రత్యేకమైన యాక్షన్ లాంగ్వేజ్ను తీసుకురావడానికి వీరు పనిచేస్తున్నారు. మరోవైపు ప్రొడక్షన్ డిజైనర్ ఏఎస్ ప్రకాశ్ భారీ సెట్స్ను రూపొందిస్తున్నారు.
రాపో సినిమాటిక్స్ బ్యానర్పై కృష్ణ పోతినేని ఈ చిత్రాన్ని నిర్మిస్తున్నారు. భారీ బడ్జెట్తో తెరకెక్కుతున్న ఈ సినిమా.. రామ్ పోతినేని కెరీర్లోనే ఒక ప్రత్యేకమైన ప్రాజెక్ట్గా నిలిచేలా ప్లాన్ చేస్తున్నట్లు తెలుస్తోంది.
హీరోగా నటిస్తూ దర్శకుడిగా బాధ్యతలు తీసుకున్న రామ్.. షూటింగ్లోనూ అదే స్థాయిలో డెడికేషన్ చూపిస్తుండటంతో ‘RaPo23’పై ఆసక్తి మరింత పెరుగుతోంది. సినిమాలోని ఇతర నటీనటులు, పాత్రలు, తదుపరి షెడ్యూల్స్కు సంబంధించిన వివరాలను మేకర్స్ త్వరలో వెల్లడించనున్నారు.
