ఏపీ విద్య, ఐటీ శాఖల మంత్రి నారా లోకేష్ దావోస్ వేదికగా ఆంధ్రప్రదేశ్కు మరో భారీ పెట్టుబడిని ఆకర్షించడంలో కీలక పాత్ర పోషించారు. అంతర్జాతీయ ఆర్థిక వేదికలపై ఏపీ అవకాశాలను సమర్థంగా ప్రస్తావిస్తున్న క్రమంలో, ప్రముఖ సంస్థ RMZ Corp రాష్ట్రంలో భారీ స్థాయి పెట్టుబడులకు ముందుకు రావడం రాజకీయంగా ప్రాధాన్యం సంతరించుకుంది.
స్విట్జర్లాండ్లోని దావోస్లో ఈ రోజు ఆర్ఎంజడ్ ఛైర్మన్ మనోజ్ మెండాతో మంత్రి నారా లోకేష్ నిర్వహించిన చర్చలు సానుకూల ఫలితాలను ఇచ్చాయి. ఈ భేటీలో భాగంగా, ఆంధ్రప్రదేశ్లో రూ.లక్ష కోట్ల పెట్టుబడులతో విస్తృత ప్రాజెక్టులను ఏర్పాటు చేసి, దాదాపు లక్ష మందికి ఉపాధి కల్పించే ప్రతిపాదనను ఆర్ఎంజడ్ సంస్థ ముందుంచినట్లు సమాచారం.
ఇదే సమయంలో Confederation of Indian Industry (CII) ఆధ్వర్యంలో దావోస్లో నిర్వహించిన రౌండ్ టేబుల్ సమావేశంలో మంత్రి నారా లోకేష్ పాల్గొన్నారు. “Sustainability at Scale: Pathways for Global Transformation” అనే అంశంపై జరిగిన ఈ చర్చల్లో ఆయన ఆంధ్రప్రదేశ్ ప్రభుత్వ ప్రాధాన్యాలు, పెట్టుబడులకు అనుకూల విధానాలు, భవిష్యత్ అభివృద్ధి లక్ష్యాలను అంతర్జాతీయ పారిశ్రామిక వర్గాలకు వివరించారు.
పెట్టుబడులకు అనుకూల వాతావరణం, ఆధునిక మౌలిక వసతులు, ఐటీ మరియు సస్టైనబుల్ అభివృద్ధి రంగాలపై రాష్ట్ర ప్రభుత్వం తీసుకుంటున్న చర్యలను మంత్రి ఈ సందర్భంగా స్పష్టంచేశారు. దావోస్ వేదికగా నారా లోకేష్ నిర్వహించిన ఈ కీలక సమావేశాలు, ఆంధ్రప్రదేశ్ను గ్లోబల్ ఇన్వెస్ట్మెంట్ డెస్టినేషన్గా తీర్చిదిద్దే దిశగా మరో కీలక ముందడుగుగా రాజకీయ వర్గాలు భావిస్తున్నాయి.
