ఆంధ్రప్రదేశ్ కాంగ్రెస్ పార్టీ అధ్యక్షురాలు షర్మిల, వైఎస్సార్ కాంగ్రెస్ అధినేత మరియు మాజీ ముఖ్యమంత్రి వైఎస్ జగన్ పర్యటనలపై తీవ్ర అభ్యంతరం వ్యక్తం చేశారు. ప్రస్తుత పరిస్థితుల్లో జగన్ ప్రజల మధ్య తిరుగుతుండడం అప్రయోజకమని పేర్కొంటూ, ఆయ‌న ప‌ర్య‌ట‌న‌ల‌కు అనుమతులు ఇవ్వ‌కూడద‌ని డిమాండ్ చేశారు. అవసరమైతే కోర్టుకు కూడా వెళతామని ఆమె హెచ్చరించారు.
గుంటూరు జిల్లా రెంటపాళ్ల గ్రామంలో జరిగిన దురదృష్టకర ఘటనపై స్పందించిన షర్మిల – జగన్ కనీస పశ్చాత్తాపం లేకుండా వ్యవహరిస్తున్నారని విమర్శించారు. వైఎస్సార్ కాంగ్రెస్ కార్యకర్త సింగయ్య, జగన్ కాన్వాయ్ కింద పడి మృతిచెందిన ఘటనలో జగన్ నిర్లక్ష్యమే కారణమని ఆరోపించారు. ఈ ఘటనపై కేసు నమోదవడాన్ని స్వాగతిస్తున్నామని తెలిపారు.
“స్పష్టమైన ఆధారాలు సేకరించి కేసులో న్యాయం జరిగేలా చూడాలి. లేకపోతే జగన్ తప్పించుకునే అవకాశాలు ఉన్నాయి,” అని షర్మిల పేర్కొన్నారు. ఇలాంటి వ్యక్తికి ప్రజల మధ్య తిరిగే అనుమతులు ఇవ్వడం వల్ల ప్రజల భద్రత ప్రమాదంలో పడుతుందని ఆమె ఆందోళన వ్యక్తం చేశారు.
షర్మిల మరోవైపు జగన్ చర్యలను తీవ్రమైన విమర్శలతోను పలికారు. “ఒకవేళ జగన్‌లో నిజంగా మానవత్వం ఉంటే, సింగయ్య కుటుంబానికి కనీసం ₹5 నుంచి ₹10 కోట్ల పరిహారం ప్రకటించి క్షమాపణలు కోరాల్సింది,” అని ఆమె సూచించారు. అలానే ప్రజల ముందూ బహిరంగంగా క్షమాపణ చెప్పాలని డిమాండ్ చేశారు.
అయితే, ఇది ఏఐతో తయారైన నకిలీ వీడియో అని చెప్పడాన్ని ఆమె తీవ్రంగా ఖండించారు. “ఇది దారుణం. చేసిన తప్పుకు బాధ్యత తీసుకోకుండా తప్పించుకోవడం సరికాదు,” అని షర్మిల పేర్కొన్నారు.
ఈ వ్యాఖ్యలు షర్మిల తిరుపతిలో మీడియాతో మాట్లాడుతూ చేశారు. గత ఐదేళ్లుగా ప్రజల సమస్యలను నిర్లక్ష్యం చేసిన జగన్, ఇప్పుడు ఓదార్పు పర్యటనల పేరుతో బయటకు రావడం దురాశగా ఉందని ఆమె వ్యాఖ్యానించారు.