71వ జాతీయ చలన చిత్ర అవార్డుల ప్రదానోత్సవం ఢిల్లీలోని విజ్ఞాన్ భవన్లో అత్యంత వైభవంగా జరిగింది. రాష్ట్రపతి ద్రౌపదీ ముర్ము విజేతలకు స్వయంగా అవార్డులు అందజేశారు. 2023 సంవత్సరానికి గాను కేంద్ర ప్రభుత్వం ప్రకటించిన ఈ అవార్డుల్లో తెలుగు సినిమాకు ప్రత్యేక స్థానం దక్కింది.
నందమూరి బాలకృష్ణ హీరోగా, అనిల్ రావిపూడి దర్శకత్వంలో వచ్చిన భగవంత్ కేసరి ఉత్తమ తెలుగు చిత్రంగా ఎంపికైంది. ఈ అవార్డు తెలుగు కమర్షియల్ సినిమా స్థాయిని మరింత ఎత్తుకు తీసుకెళ్లినట్లుగా భావిస్తున్నారు. నిర్మాత సాహు గారపాటి కూడా ఈ ఘనతను పంచుకున్నారు.
దర్శకుడు ప్రశాంత్ వర్మ సృష్టించిన సూపర్ హీరో ఎంటర్టైనర్ హనుమాన్ రెండు విభాగాల్లో జాతీయ స్థాయిలో సత్తా చాటింది.
ఉత్తమ యానిమేషన్ & విజువల్ ఎఫెక్ట్స్ విభాగంలో నిరంజన్ రెడ్డి (నిర్మాత), జెట్టి వెంకట్ కుమార్ (VFX సూపర్వైజర్) అవార్డులు అందుకున్నారు.
ఉత్తమ యాక్షన్ విభాగంలో స్టంట్ కొరియోగ్రాఫర్లు నందు, పృధ్వి జాతీయ పురస్కారాలు అందుకున్నారు.
ఇది తెలుగు సినిమా సాంకేతిక నైపుణ్యానికి గుర్తింపుగా నిలిచింది. ముఖ్యంగా VFX విభాగంలో హనుమాన్ గెలుపు తెలుగు చిత్ర పరిశ్రమను భారతీయ సూపర్ హీరో సినిమాల మ్యాప్లో నిలబెట్టిన ఘనత.
అర్జున్ రెడ్డి తో గుర్తింపు తెచ్చుకున్న సంగీత దర్శకుడు హర్షవర్ధన్ రామేశ్వర్, రణబీర్ కపూర్ నటించిన యానిమల్ చిత్రానికి అందించిన నేపథ్య సంగీతంతో జాతీయ అవార్డును అందుకున్నారు. ఇది తెలుగు సంగీత దర్శకుల ప్రతిభకు మరోసారి దేశవ్యాప్త గౌరవాన్ని తెచ్చింది.
ఈసారి తెలుగు సినిమాకు దక్కిన అవార్డులు రెండు వైపుల ప్రతిభను చూపిస్తున్నాయి
ఒకవైపు భగవంత్ కేసరి వంటి కమర్షియల్ ఎంటర్టైనర్ ఉత్తమ తెలుగు చిత్రంగా ఎంపికై, మాస్ సినిమాలు కూడా కంటెంట్ ఆధారంగా జాతీయ స్థాయిలో నిలబడగలవని నిరూపించింది.
మరోవైపు హనుమాన్ సాంకేతిక నైపుణ్యంతో, యాక్షన్-విజువల్స్ లో చేసిన ప్రయోగాలతో, దేశవ్యాప్తంగా గుర్తింపు తెచ్చింది.
సంగీత రంగంలో హర్షవర్ధన్ రామేశ్వర్ గెలుపు, యువ సంగీత దర్శకులు కూడా జాతీయ స్థాయిలో సత్తా చాటగలరని ప్రూవ్ చేసింది.