ప్రముఖ నిర్మాత ఎంఎస్ రాజు తాజాగా తన కెరీర్లోని ఓ కీలక నిర్ణయం గురించి ఆసక్తికర వ్యాఖ్యలు చేశారు. ప్రభాస్ హీరోగా తెరకెక్కిన ‘పౌర్ణమి’ సినిమా గురించి మాట్లాడిన ఆయన, ఆ చిత్రంలో ప్రభాస్ను హీరోగా ఎంపిక చేయడమే తన తప్పు అని అన్నారు. అయితే ఇది ప్రభాస్ నటన గురించి కాదని, ఆ సమయంలో ఉన్న ఆయన స్టార్ ఇమేజ్, అభిమానుల అంచనాల కారణంగానే అలా భావించానని వివరించారు.
ఇటీవల ఓ ఇంటర్వ్యూలో ఎంఎస్ రాజు మాట్లాడుతూ.. “‘పౌర్ణమి’ సినిమా చేస్తున్నప్పుడు నాకు చాలా భయమేసింది. ప్రభాస్ను హీరోగా తీసుకుని తప్పు చేశానా అనిపించింది. అప్పటికే ప్రభాస్కు భారీ ఫ్యాన్ బేస్ ఏర్పడింది. ముఖ్యంగా ‘ఛత్రపతి’ తర్వాత ఆయనపై ప్రేక్షకుల్లో మాస్ హీరో అనే ఇమేజ్ బలంగా ఏర్పడింది. అలాంటి సమయంలో నేను ఆయనతో పూర్తిగా భిన్నమైన కథను చేయాలని ప్రయత్నించాను. అందుకే ఫ్యాన్స్ వెంటనే ఆ సినిమాను అంగీకరించలేకపోయారు” అని చెప్పారు.
ఎంఎస్ రాజు, ప్రభాస్ కాంబినేషన్లో అంతకుముందు వచ్చిన ‘వర్షం’ ఘన విజయం సాధించింది. ఆ సినిమా తర్వాత ఇద్దరి మధ్య మంచి అనుబంధం ఏర్పడిందని, అదే చనువుతో ప్రభాస్ను ‘పౌర్ణమి’ చేయడానికి ఒప్పించానని ఆయన తెలిపారు.
అయితే సినిమా షూటింగ్ జరుగుతున్నప్పటి నుంచే తనలో ఒక టెన్షన్ ఉండేదని ఎంఎస్ రాజు గుర్తు చేసుకున్నారు. “నేను భయపడింది చివరకు నిజమైంది. సినిమా ప్రేక్షకులను ఆశించిన స్థాయిలో ఆకట్టుకోలేకపోయింది. ఆ విషయం ఇప్పటికీ నన్ను బాధపెడుతుంది” అని ఆయన అన్నారు.
2006లో విడుదలైన ‘పౌర్ణమి’ చిత్రానికి ప్రభుదేవా దర్శకత్వం వహించారు. ఈ చిత్రంలో ప్రభాస్, త్రిష, చార్మీ కౌర్ ప్రధాన పాత్రల్లో నటించారు. విడుదల సమయంలో బాక్సాఫీస్ వద్ద ఆశించిన విజయాన్ని అందుకోలేకపోయినప్పటికీ, సంగీతం, విజువల్స్, నటీనటుల ప్రదర్శనల కారణంగా తర్వాత కాలంలో ఈ సినిమాకు ప్రత్యేక గుర్తింపు లభించింది.