వైవిధ్యమైన పాత్రలు, ప్రయోగాత్మక సినిమాలతో ప్రత్యేక గుర్తింపు సంపాదించిన నటుడు మంచు మనోజ్ మరోసారి సోషల్ మీడియాలో చర్చనీయాంశంగా మారారు. రాబోయే సినిమాల కోసం తన ఫిట్నెస్పై ప్రత్యేకంగా దృష్టి పెట్టిన ఆయన, గత మూడు వారాలుగా కఠినమైన వర్కౌట్లు చేస్తూ తనను తాను కొత్తగా మలుచుకుంటున్నట్లు వెల్లడించారు. ఈ సందర్భంగా ఆయన షేర్ చేసిన వర్కౌట్ ఫోటోలు నెట్టింట వేగంగా వైరల్ అవుతూ అభిమానులను ఆకట్టుకుంటున్నాయి. నటుడిగా ఆయన చూపిస్తున్న పట్టుదల, క్రమశిక్షణను సినీ అభిమానులు ప్రశంసిస్తున్నారు.
ఇన్స్టాగ్రామ్లో చేసిన ఈ పోస్ట్లో మనోజ్ తన నిర్ణయం గురించి చాలా నిజాయితీగా వివరించారు. సౌకర్యంగా ఉండటానికి సాకులు వెతకకుండా కష్టపడటమే తన లక్ష్యమని ఆయన తెలిపారు. “మూడు వారాల క్రితం నేను ఒక నిర్ణయం తీసుకున్నాను. ఇక సౌకర్యంతో రాజీ పడను. ఇకపై సాకులు చెప్పను. కేవలం కష్టం మాత్రమే,” అంటూ తన ఫిట్నెస్ ప్రయాణం గురించి మనోజ్ వెల్లడించారు.
యాక్షన్ సినిమాల్లో నటించడం ఎంత కఠినమో కూడా ఆయన వివరించారు. “యాక్షన్ సినిమాలో మీ కోసం ఎవరూ నటించలేరు. ప్రతి పంచ్, ప్రతి పడిపోవడం, ప్రతి దెబ్బను మీరు స్వయంగా తీసుకోవాలి. మీ శరీరం అందుకు సిద్ధంగా ఉండాలి. లేకపోతే వెంటనే బయటపడుతుంది. కెమెరా ఎప్పుడూ అబద్ధం చెప్పదు,” అని ఆయన పేర్కొన్నారు.
ఇకపై కేవలం లుక్ కోసం కాకుండా నిజమైన శక్తి, సహనాన్ని పెంచుకోవడంపైనే దృష్టి పెట్టానని మనోజ్ తెలిపారు. తన లక్ష్యం ‘బలమైన వ్యక్తి’గా మారడమేనని చెప్పారు. ఈ ట్రాన్స్ఫర్మేషన్ అప్డేట్ను “వీక్ 3”గా పేర్కొంటూ, ఈ ప్రయాణం ఇప్పుడే మొదలైందని, కానీ కేవలం 21 రోజుల్లోనే తనలో పెద్ద మార్పు కనిపిస్తోందని ఆయన వెల్లడించారు.
ఇటీవల విడుదలైన చిత్రాలతో కూడా మంచు మనోజ్ మరోసారి ప్రేక్షకుల దృష్టిని ఆకర్షించారు. ‘మిరాయ్’ సినిమాలో ఆయన పోషించిన మహాబీర్ లామా అలియాస్ ‘బ్లాక్ స్వోర్డ్’ పాత్రకు మంచి స్పందన లభించింది. ఈ చిత్రం బాక్సాఫీస్ వద్ద మంచి విజయాన్ని సాధించగా, ముఖ్యంగా మనోజ్ చేసిన పవర్ఫుల్ పెర్ఫార్మెన్స్కు ప్రేక్షకులతో పాటు విమర్శకుల నుంచి కూడా ప్రశంసలు అందాయి.
ప్రస్తుతం మనోజ్ నటిస్తున్న ‘డేవిడ్ రెడ్డి’ సినిమా ఆయన కెరీర్లోనే అత్యంత భారీ ప్రాజెక్ట్లలో ఒకటిగా రూపొందుతోంది. దర్శకుడు హనుమ రెడ్డి యెక్కంటి తెరకెక్కిస్తున్న ఈ పాన్ ఇండియా పీరియడ్ యాక్షన్ డ్రామాను నల్లగంగుల వెంకట్ రెడ్డి, భరత్ మోతుకూరి నిర్మిస్తున్నారు. 1897 నుంచి 1920 మధ్య బ్రిటిష్ వలస పాలన కాలం నేపథ్యంలో సాగిన కథతో ఈ చిత్రం రూపొందుతోంది. అణచివేతకు ఎదురు నిలిచే ధైర్యవంతుడైన యోధుడి ప్రయాణాన్ని ఇందులో చూపించనున్నారు. అంతర్జాతీయ నటి మారియా ర్యాబోషాప్కా ఇందులో కీలక పాత్రలో నటిస్తున్నారు.
పాన్ ఇండియా ప్రేక్షకులను దృష్టిలో పెట్టుకుని ఈ చిత్రాన్ని భారీ స్థాయిలో నిర్మిస్తున్నారు. ఇటీవల విడుదలైన ‘డేవిడ్ రెడ్డి’ గ్లింప్స్ అన్ని డిజిటల్ ప్లాట్ఫామ్లలో 10 మిలియన్లకు పైగా వ్యూస్ సాధించి మంచి బజ్ను సృష్టించింది. దీంతో మనోజ్ న్యూ అవతార్పై ప్రేక్షకుల్లో ఆసక్తి మరింత పెరిగింది.
ప్రస్తుతం మంచు మనోజ్ కెరీర్లో బిజీ దశ కొనసాగుతోంది. ‘డేవిడ్ రెడ్డి’తో పాటు మరికొన్ని ఆసక్తికర ప్రాజెక్ట్లతో కూడా ఆయన త్వరలోనే ప్రేక్షకుల ముందుకు రానున్నారు.
