మెగా పవర్ స్టార్ Ram Charan హీరోగా, దర్శకుడు Buchi Babu Sana తెరకెక్కిస్తున్న భారీ పాన్‌ ఇండియా చిత్రం ‘పెద్ది’పై ప్రేక్షకుల్లో భారీ అంచనాలు నెలకొన్నాయి. ఇప్పటికే పోస్టర్లు, టీజర్, ప్రచార కంటెంట్‌తో మంచి హైప్‌ తెచ్చుకున్న ఈ చిత్రం జూన్‌ 4న ప్రపంచవ్యాప్తంగా విడుదల కానుంది. విడుదల తేదీ దగ్గరపడుతున్న నేపథ్యంలో చిత్రబృందం ప్రమోషన్స్‌ను మరింత వేగవంతం చేసింది.
ఈ క్రమంలో రామ్ చరణ్, దర్శకుడు బుచ్చిబాబు కలిసి చేసిన ఓ స్పెషల్‌ ఇంటర్వ్యూ ప్రస్తుతం సోషల్ మీడియాలో వైరల్‌గా మారింది. ఈ వీడియోలో ఇద్దరూ కార్ డ్రైవ్‌కు వెళ్లి సరదాగా మాట్లాడుకున్నారు. “ఇంత బిజీ షెడ్యూల్‌లో నన్ను డ్రైవ్‌కు తీసుకువచ్చినందుకు థాంక్యూ చరణ్ సర్‌” అని బుచ్చిబాబు చెప్పగా, వెంటనే చరణ్ నవ్వుతూ “నువ్వు ముందుగా పెద్ది ఎప్పుడు వస్తుందో కచ్చితంగా చెప్పు” అని అన్నారు.
దీనికి స్పందించిన బుచ్చిబాబు, “జూన్‌ 4న పెద్ది ప్రేక్షకుల ముందుకు వస్తోంది. అందరూ థియేటర్లలో చూసి ఎంజాయ్‌ చేయాలి” అని తెలిపారు. రామ్ చరణ్ కూడా అభిమానులను థియేటర్లలో సినిమా చూసి ఆదరించాలని కోరారు.
1980ల కాలంలో ఉత్తరాంధ్ర, ముఖ్యంగా విజయనగరం ప్రాంత గ్రామీణ నేపథ్యంలో ఈ సినిమా కథ సాగుతుంది. గ్రామంలో ఉండే ధైర్యవంతుడు, ఉత్సాహభరితుడైన పెద్ది పహెల్వాన్ అనే యువకుడు క్రికెట్‌, రెజ్లింగ్‌ వంటి క్రీడల ద్వారా తన గ్రామ ప్రజలను ఒక్కటిగా చేసి, అణచివేతకు వ్యతిరేకంగా పోరాడుతూ తమ స్వాభిమానాన్ని కాపాడే కథగా సినిమా రూపొందుతోంది. గ్రామీణ భావోద్వేగాలు, క్రీడా నేపథ్యం, మాస్‌ యాక్షన్‌ అంశాలు ఈ చిత్రానికి ప్రధాన ఆకర్షణగా నిలవనున్నాయి.
గ్రామీణ నేపథ్యంలో స్పోర్ట్స్‌ డ్రామాగా రూపొందుతున్న పెద్దిలో రామ్ చరణ్ కొత్త లుక్‌, మాస్‌ అవతార్ ఇప్పటికే అభిమానులను ఆకట్టుకున్నాయి. సంగీత దర్శకుడు A. R. Rahman అందిస్తున్న సంగీతం కూడా సినిమాపై అంచనాలను మరింత పెంచుతోంది.
ఇప్పటికే “PEDDI POWERPLAY TOUR” పేరుతో దేశవ్యాప్తంగా భారీ ప్రమోషనల్‌ ఈవెంట్స్‌కు ప్లాన్‌ చేసిన చిత్రబృందం, విడుదలకు ముందు సినిమాపై మరింత క్రేజ్‌ తీసుకురావాలని చూస్తోంది. అభిమానులు ఇప్పుడు జూన్‌ 4 కోసం ఆసక్తిగా ఎదురుచూస్తున్నారు.
