పాన్ ఇండియా నిర్మాణ సంస్థ మైత్రీ మూవీ మేకర్స్ భారీ బడ్జెట్ చిత్రాలతో పాటు విభిన్న కథాంశాలతో కూడిన చిన్న సినిమాలను కూడా ప్రోత్సహిస్తోంది. ఈ క్రమంలో ఆ సంస్థ నిర్మిస్తున్న మరో ఆసక్తికరమైన చిత్రం ‘DNK’. మౌళి తనూజ్ ప్రశాంత్ హీరోగా నటిస్తున్న ఈ సినిమాతో శ్రీను కంబాల దర్శకుడిగా పరిచయం అవుతున్నారు. క్రైమ్ కామెడీ ఎంటర్‌టైనర్‌గా తెరకెక్కిన ఈ చిత్రానికి ఇప్పటికే విడుదలైన ప్రమోషనల్ కంటెంట్ మంచి బజ్ క్రియేట్ చేసింది. నవంబర్ 13న ఈ సినిమా ప్రేక్షకుల ముందుకు రానుంది.
ఈ నేపథ్యంలో హీరో మౌళి తనూజ్ ప్రశాంత్ మీడియాతో ముచ్చటించి సినిమా విశేషాలను పంచుకున్నారు. ముందుగా సినిమా టైటిల్ గురించి మాట్లాడుతూ.. ‘దొంగ నా కొడకా’ అనే టైటిల్ కథకు చాలా పర్ఫెక్ట్‌గా అనిపించిందని, అయితే సెన్సార్ అభ్యంతరాల కారణంగా ‘DNK’గా మార్చాల్సి వచ్చిందని తెలిపారు. తమ సినిమా ట్రైలర్‌ను రవితేజ విడుదల చేయడం చాలా సంతోషంగా అనిపించిందని, ప్రమోషన్స్‌లో భాగంగా ఆంధ్రప్రదేశ్‌లో నిర్వహించిన టూర్‌కు ప్రేక్షకుల నుంచి మంచి స్పందన వచ్చిందని చెప్పారు.
ఫస్ట్ నుంచి లాస్ట్ వరకు నవ్విస్తూనే ఉంటుంది!
‘DNK’ కథను అంగీకరించడానికి ప్రధాన కారణం ఇందులోని ఎంటర్‌టైన్‌మెంట్ అని మౌళి తెలిపారు. ఫస్ట్ నుంచి లాస్ట్ వరకు సినిమా అవుట్ అండ్ అవుట్ ఎంటర్‌టైనర్‌గా సాగుతుందని, ప్రేక్షకులు హాయిగా నవ్వుకునేలా ఉంటుందని చెప్పారు. ఇందులో క్రైమ్ ఎలిమెంట్ ఉన్నప్పటికీ దాన్ని కూడా చాలా ఫన్‌గా చూపించామని వెల్లడించారు.
కథలో ప్రధాన పాత్ర ఈజీ మనీకి అలవాటు పడిన ఓ కుర్రాడిదని వివరించారు. గ్యాంబ్లింగ్ ద్వారా డబ్బులు సంపాదించవచ్చని భావించి ఆ మార్గాన్ని ఎంచుకుంటాడని, అయితే అతని నిర్ణయాల కారణంగా అప్పుల్లో కూరుకుపోతాడని చెప్పారు. ఆ అప్పుల నుంచి బయటపడేందుకు ఓ దొంగతనానికి పాల్పడతాడని, ఆ తర్వాత అతను ఎదుర్కొనే సమస్యలు, ఇబ్బందుల చుట్టూ కథ సాగుతుందని తెలిపారు.
ప్రొడక్షన్ గురించి నేర్చుకోవాలనే ఆసక్తితోనే..
సినిమా నిర్మాణంలో తాను కూడా భాగస్వామ్యం కావడం వల్ల బడ్జెట్ తగ్గిందని నిర్మాత రవి చెప్పడంపై స్పందిస్తూ.. అది ఆయన మంచితనమని మౌళి అన్నారు. మైత్రీ అనిల్ గారితో కలిసి మంచి టీమ్‌వర్క్‌తో సినిమాను పూర్తి చేశామని తెలిపారు. ప్రొడక్షన్ గురించి తెలుసుకోవాలనే ఆసక్తితోనే తాను ఈ ప్రక్రియలో పాల్గొన్నానని, అనిల్ గారే నిర్మాణానికి సంబంధించిన అన్ని విషయాలను చూసుకున్నారని వివరించారు. ప్రొడక్షన్ అనేది ఎంతో నైపుణ్యం అవసరమైన బాధ్యత అని, ఈ సినిమా ద్వారా ఆ విభాగం గురించి నేర్చుకునే అవకాశం లభించిందని చెప్పారు.
ఆలీతో వర్కింగ్ ఎక్స్‌పీరియన్స్ అద్భుతం!
ప్రముఖ నటుడు ఆలీతో కలిసి పనిచేయడం చాలా మంచి అనుభవమని మౌళి తెలిపారు. ఆయన నటన వల్ల సినిమాలోని ఆ పాత్రకు మరింత బలం చేకూరిందని చెప్పారు. ఇప్పటివరకు ఆలీ ఎక్కువగా ఫాదర్ రోల్స్ చేయలేదని, ఈ సినిమాలో ఆయనకు సంబంధించిన సన్నివేశాలు అద్భుతంగా వచ్చాయని పేర్కొన్నారు.
సినిమాలో వినోదంతో పాటు ఆసక్తికరమైన ట్విస్టులు కూడా ఉంటాయని, సింజిత్ మంచి సంగీతాన్ని అందించారని వెల్లడించారు. పాటలను ప్రేక్షకులు థియేటర్లలో బాగా ఎంజాయ్ చేస్తారని, బ్యాక్‌గ్రౌండ్ స్కోర్ కూడా చాలా ఫ్రెష్‌గా ఉంటుందని చెప్పారు.
డాన్స్ నేర్పించిన సందీప్ మాస్టర్!
ఈ సినిమాలో డాన్స్ చేయడం గురించి మాట్లాడుతూ.. తనకు ఇంతకుముందు డాన్స్ అలవాటు లేదని మౌళి తెలిపారు. అయితే సందీప్ మాస్టర్ ఎంతో సపోర్ట్ చేసి డాన్స్ నేర్పించారని, సినిమాలో ఓ ప్రత్యేకమైన డాన్స్ నంబర్ చేశానని చెప్పారు. ఆ పాట చాలా అద్భుతంగా వచ్చిందని, థియేటర్లలో ప్రేక్షకులు కచ్చితంగా ఎంజాయ్ చేస్తారని ధీమా వ్యక్తం చేశారు.
ఇక సినిమాలోని బబ్లూ పాత్ర చాలా ఆసక్తికరంగా ఉంటుందని, ఆ పాత్ర వైజాగ్‌కు చెందినదని తెలిపారు. కథ కూడా వైజాగ్ నేపథ్యంలోనే సాగుతుందని చెప్పారు.
దర్శకత్వంపై ఇప్పుడే ఆలోచన లేదు!
భవిష్యత్తులో దర్శకత్వం చేసే ఆలోచన ఉందా అనే ప్రశ్నకు స్పందిస్తూ.. డైరెక్షన్ చేయాలనే ఆసక్తి తనకు ఉందని, అయితే దర్శకత్వం అనేది చాలా పెద్ద బాధ్యత అని అన్నారు. ఇప్పుడే ఆ దిశగా అడుగులు వేయనని, అందుకు ఇంకా చాలా సమయం ఉందని స్పష్టం చేశారు.
భవిష్యత్తులో ఎలాంటి సినిమాలు చేయాలనుకుంటున్నారనే ప్రశ్నకు.. కొత్త కథలు, విభిన్నమైన ఎంటర్‌టైనింగ్ సినిమాలు చేయాలని ఉందని చెప్పారు. ఇప్పటికే కొన్ని కథలు విన్నానని, వాటిని మరింత ముందుకు తీసుకెళ్లాల్సి ఉందని మౌళి తనూజ్ ప్రశాంత్ వెల్లడించారు.
క్రైమ్, కామెడీ, ట్విస్టులు, మ్యూజిక్‌తో ప్రేక్షకులను అలరించేందుకు సిద్ధమవుతున్న ‘DNK’ నవంబర్ 13న థియేటర్లలో విడుదల కానుంది.
