వెర్సటైల్ స్టార్ దుల్కర్ సల్మాన్ హీరోగా, క్రియేటివ్ డైరెక్టర్ పవన్ సాధినేని దర్శకత్వంలో తెరకెక్కుతున్న విభిన్నమైన ఎమోషనల్ డ్రామా ‘ఆకాశంలో ఒక తార’. గీతా ఆర్ట్స్, స్వప్న సినిమా, లైట్‌బాక్స్ మీడియా బ్యానర్లపై సందీప్ గున్నం, రమ్య గున్నం ఈ చిత్రాన్ని నిర్మిస్తున్నారు. సాత్విక వీరవల్లి హీరోయిన్‌గా పరిచయమవుతుండగా, శ్రుతి హాసన్, రుహాని శర్మ కీలక పాత్రల్లో కనిపించనున్నారు.
ఇప్పటికే విడుదలైన గ్లింప్స్, టీజర్, పాట సినిమాపై ఆసక్తిని పెంచాయి. నవంబర్ 20న తెలుగు, తమిళం, హిందీ, మలయాళ భాషల్లో ఈ సినిమా పాన్ ఇండియా స్థాయిలో ప్రేక్షకుల ముందుకు రానుంది. ఈ నేపథ్యంలో కథానాయిక సాత్విక వీరవల్లి మీడియాతో ముచ్చటించారు. తన సినీ ప్రయాణం, పాత్ర స్వభావం, దుల్కర్ సల్మాన్‌తో పనిచేసిన అనుభవం సహా పలు ఆసక్తికర విషయాలను వెల్లడించారు.
ఇంజనీర్ నుంచి నటిగా మారిన ప్రయాణం
తాను అమెరికాలో పుట్టి పెరిగానని సాత్విక తెలిపారు. ఇంజనీరింగ్, మాస్టర్స్ పూర్తి చేసిన తర్వాత రెండేళ్ల పాటు ఓ సంస్థలో ఇంజనీర్‌గా పనిచేశానని చెప్పారు. అయితే క్రియేటివ్ రంగంలోకి రావాలనే ఆసక్తితో సినిమాల వైపు అడుగులు వేసినట్లు వెల్లడించారు. మొదట ‘కాంత’ సినిమా కోసం ఆడిషన్ ఇచ్చినా ఎంపిక కాలేదని, అదే నిర్మాత మరో తమిళ సినిమా కోసం అవకాశం ఇవ్వడంతో ఆడిషన్‌లో పాల్గొని ఎంపికయ్యానని చెప్పారు. ఆ తర్వాత ఇండియాకు వచ్చానని, కొద్ది రోజులకే ‘ఆకాశంలో ఒక తార’లో నటించే అవకాశం రావడంతో ఉద్యోగాన్ని వదిలి నటనను కెరీర్‌గా ఎంచుకున్నానని తెలిపారు.
తన తండ్రి ఒక్కరే ఇంట్లో తెలుగు మాట్లాడతారని, ఇంట్లో తెలుగు వాతావరణం ఉండటంతో భాషపై త్వరగానే పట్టు సాధించానని చెప్పారు. ఈ సినిమా కోసం ప్రత్యేకంగా తెలుగు భాషలో శిక్షణ కూడా తీసుకున్నట్లు వెల్లడించారు. చిన్నప్పటి నుంచి కర్ణాటక సంగీతం, భరతనాట్యం నేర్చుకున్నానని తెలిపారు.
అంతరిక్షమే లక్ష్యంగా సాగే అమాయకమైన అమ్మాయి పాత్ర
‘ఆకాశంలో ఒక తార’లో తన పాత్ర చాలా ప్రత్యేకమని సాత్విక చెప్పారు. నిజ జీవితంలో తన వ్యక్తిత్వానికి, సినిమాలోని పాత్రకు చాలా తేడా ఉంటుందని వివరించారు. సినిమాలో తన పాత్ర చాలా ప్రశాంతంగా, మృదువుగా మాట్లాడుతుందని, ఎప్పుడూ అంతరిక్షం గురించే ఆలోచిస్తూ ఉంటుందని తెలిపారు.
“తన చుట్టూ ఉన్నవాళ్లు ఎంత నిరుత్సాహపరిచినా పట్టించుకోకుండా తన లక్ష్యం వైపే ప్రయాణిస్తుంది. అంతరిక్షంలోకి వెళ్లాలన్నదే ఆమె కల. ఈ పాత్ర ద్వారా ప్రతి ఒక్కరికీ ఒక మంచి సందేశం అందుతుంది. మనం ఏ రంగంలో రాణించాలన్నా మనపై మనకు నమ్మకం ఉండాలి. ఇతరులు ఏమనుకుంటున్నారో ఆలోచించకుండా లక్ష్యం కోసం కష్టపడాలి” అని సాత్విక పేర్కొన్నారు.
దుల్కర్ సల్మాన్ ఇచ్చిన ప్రోత్సాహం మర్చిపోలేను
దుల్కర్ సల్మాన్‌తో కలిసి పనిచేయడం చాలా ఆనందంగా అనిపించిందని సాత్విక తెలిపారు. ఆయన ఎంతో మంచి వ్యక్తి అని, కొత్తగా సినిమాల్లోకి వచ్చిన తనకు ఎంతో ప్రోత్సాహం అందించారని చెప్పారు.
“మొదటి రోజు షూటింగ్‌లో చాలా టెన్షన్ పడ్డాను. సినిమాలో ఒక జాతర సన్నివేశం ఉంటుంది. అక్కడ చాలామంది మధ్యలో నటించాల్సి రావడంతో మొదట్లో భయపడ్డాను. ఆ సమయంలో దుల్కర్ సర్ ఇచ్చిన సపోర్ట్ ఎప్పటికీ మర్చిపోలేను” అని తన అనుభవాన్ని పంచుకున్నారు.
శ్రుతి హాసన్, రుహాని శర్మ నుంచి ఎన్నో నేర్చుకున్నా
శ్రుతి హాసన్, రుహాని శర్మ ఇద్దరూ అద్భుతమైన నటీమణులని సాత్విక ప్రశంసించారు. రుహాని శర్మను మొదటిసారి కలిసినప్పుడే ఈ అవకాశాన్ని సద్వినియోగం చేసుకోవాలని సూచించారని, ఏదైనా సహాయం కావాలంటే అడగమని చెప్పారని గుర్తుచేసుకున్నారు. ఇక శ్రుతి హాసన్ ఒక పవర్‌హౌస్ అని, ఆమెతో కలిసి పనిచేయడం ద్వారా ఎన్నో విషయాలు నేర్చుకున్నానని తెలిపారు.
అమెరికాలో పెరిగి.. సినిమాలో పల్లెటూరి అమ్మాయిగా!
అమెరికాలో పుట్టి పెరిగిన తనకు ఈ సినిమాలో పల్లెటూరి అమ్మాయి పాత్ర చేయడం కొత్త అనుభూతిని ఇచ్చిందని సాత్విక చెప్పారు. ఈ మార్పు కొంత సవాలుగా అనిపించినా, పాత్రలోకి మారిన తర్వాత చాలా ఆనందం కలిగిందని తెలిపారు.
“స్కూల్ డ్రెస్‌లో నన్ను నేను అద్దంలో చూసుకున్నప్పుడు చాలా ఆశ్చర్యపోయాను. నేను ఇలా కూడా కనిపించవచ్చా అనిపించింది. నాలో వచ్చిన మార్పును చూసి మా అమ్మ కూడా చాలా సంతోషించింది. నా నిజ జీవితానికి పూర్తిగా భిన్నమైన పాత్రలో నటించడం ఒక అద్భుతమైన అనుభవం. ఒక నటిగా విభిన్నమైన జీవితాలను తెరపై అనుభవించే అవకాశం సినిమాతోనే సాధ్యమవుతుంది” అని చెప్పారు.
జీవీ ప్రకాష్ సంగీతం అద్భుతం
సంగీత దర్శకుడు జీవీ ప్రకాష్ కుమార్ చాలా ప్రతిభావంతుడని, ఈ సినిమాకు మంచి పాటలు అందించారని సాత్విక అన్నారు. షూటింగ్ సమయంలో ఖాళీ దొరికినప్పుడల్లా గంగరాజు గారి కార్యాలయానికి వెళ్లి పాటలు, సాహిత్యం గురించి తెలుసుకునేదాన్నని చెప్పారు. పాటల్లోని ప్రతి పదానికి ఉన్న అర్థాన్ని ఆయన వివరంగా చెప్పేవారని, ఆ అనుభవం తనకు ఎంతో ప్రత్యేకమని వెల్లడించారు.
తల్లిదండ్రుల ప్రోత్సాహమే తనకు స్ఫూర్తి
సినిమా రంగంలోకి రావడానికి తన తల్లిదండ్రుల ప్రోత్సాహమే ప్రధాన కారణమని సాత్విక తెలిపారు. చిన్నప్పటి నుంచి తాను ఏదైనా సాధించగలననే నమ్మకాన్ని వారు కల్పించారని చెప్పారు. అలాంటి ప్రోత్సాహం ఉంటే ఎవరైనా తమ కలలను నిజం చేసుకోవచ్చని అభిప్రాయపడ్డారు.
అమ్మాయి విజయానికి అండగా నిలిచే అబ్బాయి కథ!
ఈ సినిమాలో తనకు నచ్చిన స్ఫూర్తిదాయకమైన అంశాన్ని వివరిస్తూ సాత్విక ఆసక్తికర వ్యాఖ్యలు చేశారు.
“ప్రతి మగాడి విజయం వెనుక ఒక స్త్రీ ఉంటుందని అంటుంటారు. కానీ ఈ సినిమాలో ఒక అమ్మాయి విజయం వెనుక గొప్ప మనసున్న అబ్బాయి ఉంటాడు. నా దృష్టిలో ఒకరినొకరు ప్రోత్సహించుకుంటూ ముందుకు సాగడం చాలా ముఖ్యం. అలా పరస్పరం అండగా నిలిస్తే జీవితం మరింత అందంగా ఉంటుంది. ఈ సినిమా ప్రేక్షకులకు గొప్ప అనుభూతిని అందిస్తుంది” అని తెలిపారు.
తదుపరి సినిమాల గురించి
ప్రస్తుతం తమిళంలో ఒక ప్రాజెక్ట్ చేస్తున్నానని, తెలుగులో కూడా మరో సినిమా అంగీకరించినట్లు సాత్విక వెల్లడించారు. ఈ చిత్రాలకు సంబంధించిన అధికారిక ప్రకటనలు త్వరలోనే వస్తాయని చెప్పారు.
విభిన్నమైన కథాంశం, భావోద్వేగాలతో కూడిన పాత్రలు, ప్రతిభావంతులైన నటీనటుల కలయికలో రూపొందుతున్న ‘ఆకాశంలో ఒక తార’ నవంబర్ 20న ప్రేక్షకుల ముందుకు రానుంది.
