మాజీ ఇంటలిజెన్స్ అదనపు డీజీపీ ఏ.బీ. వెంకటేశ్వరరావుపై నమోదైన కేసును ఆంధ్రప్రదేశ్ ప్రభుత్వం అధికారికంగా విరమించుకుంది. హైకోర్టు ఎఫ్‌ఐఆర్ మరియు చార్జిషీట్‌ను రద్దు చేసిన నేపథ్యంలో, ఇకపై ఆయనపై ఎటువంటి చట్టపరమైన లేదా శాఖాపరమైన చర్యలు తీసుకోబోమని ప్రభుత్వం స్పష్టం చేసింది.
ఈ మేరకు మంగళవారం ప్రభుత్వ ప్రధాన కార్యదర్శి కె. విజయానంద్ జారీ చేసిన జి.ఓ. ఆర్.టి. నెం.1334లో వివరాలు వెల్లడయ్యాయి. ఏసీబీ చేసిన కేసులో 120(బి) – క్రిమినల్ కుట్ర, 420 – మోసం, 409 – నమ్మకద్రోహం వంటి సెక్షన్లు, అలాగే అవినీతి నిరోధక చట్టంలోని నిబంధనలు ఉన్నాయి. అయితే, వెంకటేశ్వరరావు వేసిన క్రిమినల్ పిటిషన్‌పై విచారణ జరిపిన హైకోర్టు, ఈ ఎఫ్‌ఐఆర్‌ను తోసిపుచ్చింది.
దీంతో, ఈ కేసును సుప్రీంకోర్టులోకి తీసుకెళ్లాల్సిన అవసరం లేదని ప్రభుత్వం భావించి, స్పెషల్ లీవ్ పిటిషన్ (SLP) దాఖలు చేయకూడదని నిర్ణయించింది. తద్వారా, కేసును పూర్తిగా ముగిస్తామంటూ ప్రభుత్వ ఉత్తర్వులు విడుదలయ్యాయి.
ఈ నిర్ణయాన్ని అమలుచేయాలని డీజీపీకి ప్రభుత్వం స్పష్టమైన ఆదేశాలు ఇచ్చింది.
