ఆంధ్రప్రదేశ్‌కు పెట్టుబడుల ప్రవాహం కొనసాగుతోంది. విశాఖపట్నంలో జరుగుతున్న సీఐఐ 31వ పార్ట్‌నర్‌షిప్ సమ్మిట్ రెండో రోజు కూడా రాష్ట్రానికి భారీ పెట్టుబడులు వచ్చాయి. రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్ సమక్షంలో 24 కంపెనీలు ఏపీ ప్రభుత్వంతో పెట్టుబడుల ఒప్పందాలు కుదుర్చుకున్నాయి. మొత్తం రూ.1,05,634 కోట్ల పెట్టుబడులతో పాటు 75,055 మందికి ఉద్యోగావకాశాలు కల్పించేలా ఈ ఒప్పందాలు జరిగాయి.
ఈ సందర్భంగా నారా లోకేష్ మాట్లాడుతూ.. ఆంధ్రప్రదేశ్‌లో సాధారణ డబుల్ ఇంజిన్ ప్రభుత్వం కాకుండా ‘డబుల్ ఇంజిన్ బుల్లెట్ ట్రైన్ సర్కార్’ పనిచేస్తోందని వ్యాఖ్యానించారు. కేంద్ర, రాష్ట్ర ప్రభుత్వాల మధ్య సమన్వయం కారణంగా ఇతర రాష్ట్రాల కంటే వేగంగా అభివృద్ధి సాధ్యమవుతోందని చెప్పారు. పారిశ్రామిక రంగ అభివృద్ధికి రాష్ట్ర ప్రభుత్వం నిర్దిష్ట వ్యూహంతో ముందుకు సాగుతోందని, వర్టికల్ ఇంటిగ్రేషన్, హారిజాంటల్ ఇంటిగ్రేషన్ రెండింటినీ ఏకకాలంలో అభివృద్ధి చేస్తున్నామని వివరించారు.
ముఖ్యంగా సూక్ష్మ, చిన్న, మధ్యతరహా పరిశ్రమలైన MSMEలను ఒకే ఎకోసిస్టమ్‌లోకి తీసుకురావడమే పారిశ్రామిక అభివృద్ధిలో అసలైన విజయమని లోకేష్ పేర్కొన్నారు. పరిశ్రమల మధ్య అనుసంధానం పెంచడం ద్వారా పెట్టుబడులకు, ఉపాధి కల్పనకు మరింత అనుకూలమైన వాతావరణం ఏర్పడుతుందని అన్నారు.
ప్రతి ఒక్కరికీ కలలు ఉంటాయని, అయితే వాటిని నిజం చేయడానికి పట్టుదల, అంకితభావం, అమలు చేసే సామర్థ్యం ఎంతో అవసరమని మంత్రి చెప్పారు. ఆ సామర్థ్యం ఆంధ్రప్రదేశ్‌కు ఉందని, ఆలోచనలను వాస్తవ రూపంలోకి తీసుకురాగల సత్తా రాష్ట్రానికి ఉందని పెట్టుబడిదారులు బలంగా విశ్వసిస్తున్నారని తెలిపారు. మిట్టల్ స్టీల్ ప్లాంట్, భోగాపురం అంతర్జాతీయ విమానాశ్రయం వంటి ప్రాజెక్టులు ‘బ్రాండ్ ఏపీ’కి నిదర్శనమని పేర్కొన్నారు.
ఇటీవల రాష్ట్రంలో వరుసగా రెండు తుఫానులు సంభవించిన సమయంలో ప్రభుత్వం, అధికార యంత్రాంగం సమర్థంగా పనిచేశాయని నారా లోకేష్ గుర్తుచేశారు. ముఖ్యమంత్రి చంద్రబాబు నాయుడు రోజుకు 23 గంటల పాటు శ్రమిస్తూ పరిస్థితిని పర్యవేక్షించారని, అధికారులు అప్రమత్తంగా వ్యవహరించి ప్రాణనష్టం జరగకుండా చర్యలు తీసుకున్నారని చెప్పారు.
విపత్కర పరిస్థితుల్లో విద్యుత్ సిబ్బంది రాత్రింబవళ్లు పనిచేస్తుండగా, విశాఖ ప్రజలు వారికి వేడివేడి టీ అందించి తమ మద్దతు తెలిపారని వివరించారు. ఈ సంఘటన రాష్ట్ర ప్రజల్లో ఉన్న మానవతా దృక్పథానికి నిదర్శనమని అన్నారు. భవిష్యత్తులో ప్రకృతి విపత్తులను సమర్థంగా ఎదుర్కొనేలా మరింత పటిష్టమైన వ్యవస్థలను నిర్మిస్తామని వెల్లడించారు.
సీఐఐ సదస్సు రెండో రోజు కుదిరిన రూ.1.05 లక్షల కోట్లకు పైగా పెట్టుబడి ఒప్పందాలు, 75 వేలకు పైగా ఉద్యోగావకాశాలు ఆంధ్రప్రదేశ్ పారిశ్రామిక రంగానికి మరింత ఊతమిస్తాయని ప్రభుత్వం ఆశిస్తోంది.
