నేపాల్‌లో నెలకొన్న ప్రతికూల పరిస్థితుల కారణంగా ఆంధ్రప్రదేశ్‌కు చెందిన పౌరుల భద్రతపై రాష్ట్ర ఐటి, పంచాయతీ రాజ్ మరియు గ్రామీణాభివృద్ధి శాఖ మంత్రి నారా లోకేష్ తక్షణ చర్యలు ప్రారంభించారు. అందువల్ల ఆయన అనంతపురం పర్యటనను రద్దు చేసి, ఉదయం 10 గంటలకు సచివాలయంలోని రియల్ టైమ్ గవర్నెన్స్ (RTGS) సెంటర్ కు వెళ్లి పరిస్థితిని సమీక్షించనున్నారు.
ప్రత్యేక వార్ రూమ్ ఏర్పాటు
నేపాల్‌లో చిక్కుకున్న ఏపీ వాసుల సమస్యలను పర్యవేక్షించేందుకు RTGS వేదికగా ప్రత్యేక వార్ రూమ్ ఏర్పాటు చేయాలని లోకేష్ ఆదేశించారు. సంబంధిత అధికారులు తక్షణమే ఆర్టీజీఎస్ సెంటర్‌కి చేరుకోవాలని ఆయన సూచించారు. పరిస్థితి గంభీరత దృష్ట్యా ఎలాంటి ఆలస్యం జరగకుండా ఉండాలని మంత్రి స్పష్టం చేశారు.
కాల్ సెంటర్ – వాట్సాప్ నంబర్
ప్రభుత్వం తరపున ప్రత్యేక కాల్ సెంటర్, వాట్సాప్ నంబర్ ఏర్పాటు చేసి పౌరులు, వారి కుటుంబ సభ్యులు నేరుగా సమాచారం అందించగలిగేలా చర్యలు తీసుకుంటున్నారు. నేపాల్‌లో చిక్కుకున్న వారి వివరాలు సేకరించి, వారికి సహాయం చేయడానికి ఒక ప్రత్యేక బృందాన్ని లోకేష్ ఇప్పటికే ఆదేశించారు.
కేంద్రంతో సమన్వయం
నేపాల్‌లోని ఆంధ్రుల రక్షణకు కేంద్ర ప్రభుత్వ సహకారంతో తక్షణ చర్యలు తీసుకోవాలని మంత్రి లోకేష్ స్పష్టం చేశారు. రాష్ట్ర ప్రభుత్వం తరపున ఇప్పటికే కేంద్రానికి సమాచారం అందించగా, వారిని సురక్షితంగా తిరిగి రాష్ట్రానికి రప్పించేందుకు అన్ని రకాల చర్యలు చేపడుతున్నారు.
“ప్రతి ఒక్కరు మా కుటుంబ సభ్యుడే” – లోకేష్
ఈ సందర్భంగా మంత్రి నారా లోకేష్ మాట్లాడుతూ, “ఎక్కడ ఉన్నా ప్రతి ఆంధ్రుడు మా కుటుంబ సభ్యుడే. వారిని సురక్షితంగా ఇంటికీ తీసుకురావడం మా బాధ్యత. ఎవరూ ఆందోళన చెందాల్సిన అవసరం లేదు. ప్రభుత్వం ప్రజలతో ఉంది” అని హామీ ఇచ్చారు.
రాష్ట్ర ప్రజల సమస్యలను వేగంగా పరిష్కరించడంలో ఎల్లప్పుడూ ముందుండే నారా లోకేష్, ఈసారి కూడా నేపాల్ సంక్షోభంలో చిక్కుకున్న ఆంధ్రుల కోసం వ్యక్తిగతంగా రంగంలోకి దిగి చర్యలు తీసుకోవడం రాజకీయ వర్గాల్లో చర్చనీయాంశమైంది.