ఆంధ్రప్రదేశ్లో చరిత్ర జాడల అన్వేషణకు ఉప ముఖ్యమంత్రి పవన్ కళ్యాణ్ శ్రీకారం చుట్టారు. నల్లమల అటవీ ప్రాంతంలో దాగి ఉన్న అమూల్యమైన చారిత్రక, సాంస్కృతిక వారసత్వ సంపదను గుర్తించి, సంరక్షించేందుకు భారత పురావస్తు సర్వే సంస్థ (ఏఎస్ఐ)కు ఆంధ్రప్రదేశ్ ప్రభుత్వం అనుమతులు మంజూరు చేసింది. ఈ నిర్ణయం రాష్ట్ర చరిత్రను మళ్లీ రాయడానికి, భావితరాలకు మన ప్రాచీన వారసత్వాన్ని అందించడానికి కీలకమైన మైలురాయిగా నిలుస్తుంది. దీనితో అటవీ పరిరక్షణ మరియు పురావస్తు సంరక్షణ ఏర్పడుతుంది.
రాష్ట్ర ఉపముఖ్యమంత్రి, అటవీ పర్యావరణ శాఖల మంత్రి పవన్ కళ్యాణ్ ఈ సర్వేపై స్పందిస్తూ, వన్యప్రాణుల సంరక్షణ, అటవీ పరిరక్షణ లక్ష్యాలకు భంగం కలగకుండా రాష్ట్ర అటవీ శాఖ అధికారులు పూర్తి సహకారం అందించాలి అని స్పష్టం చేశారు. ఈ మాటల్లో రెండు ముఖ్యమైన విషయాలు తేట తెల్లం అవుతున్నాయి. మొదటిది…. వన్యప్రాణి సంరక్షణ. నల్లమల అడవి పులులకు, ఏనుగులకు నిలయం. వాటి జీవనశైలి కి భంగం కలగకుండా, వాటి భద్రతను కాపాడాలి. రెండవది…. పురావస్తు సంరక్షణ. 10,000 సంవత్సరాల నాటి గుహచిత్రాలు, శాసనాలను వెతకాలి. ఈ రెండింటి మధ్య సమతుల్యత సాధించి సంరక్షించడమే ఆంధ్రప్రదేశ్ ప్రభుత్వం ముందున్న కర్తవ్యం. నల్లమల అడవులు, జీవ వైవిధ్యంతో పాటు చారిత్రక పురావస్తు, సాంస్కృతిక సంపదకు నిలయాలు అని మంత్రి పవన్ కళ్యాణ్ స్పష్టం చేశారు.
గతంలో వైఎస్ఆర్ కడప జిల్లాలోని లంకమల అటవీ ప్రాంతంలో నిర్వహించిన సర్వే ఫలితాలు ఈ కొత్త సర్వేకి మార్గదర్శకాలు. లంకమలలో 30 శాసనాలు వెలుగు చూశాయి. ఇవి క్రీస్తుపూర్వ 1వ శతాబ్దం నుంచి క్రీస్తుశకం 16వ శతాబ్దం వరకు ఉన్నవి. 10,000 సంవత్సరాల నాటి గుహలలో అనాటి చిత్రాలు గుర్తించబడ్డాయి. అంతే కాకుండా శాతవాహనుల కాలం, బౌద్ధ, శైవ సంప్రదాయాలకు సంబంధించిన విలువైన సమాచారం వెలుగులోకి వచ్చింది. ప్రాచీన యాత్రా మార్గాలు, ఆది మానవ జీవన విధానాలు కూడా అర్థమయ్యాయి.
తాజా ఏఎస్ఐ సర్వే కొత్త దిశలో సాగనుంది. మొదటిది, లిపులపై దృష్టి. తెలుగు, దేవనాగరి లిపుల్లో లిఖించిన శాసనాలపై ప్రత్యేక దృష్టి పెట్టనున్నారు. రెండవది, లోతైన అధ్యయనం. ప్రాచీన రాజ్యాలు, సంస్కృతి, సంప్రదాయాలు, గురించి తెలుసుకోవడం. వీటి వలన దక్షిణ భారత చరిత్రను మరింత లోతుగా అధ్యయనం చేసే వీలు కలుగుతుంది. మూడవది, ఎకో టూరిజం అవకాశాలు. అటవీ ప్రాంతాల్లోని చారిత్రక కట్టడాలు, పురావస్తు అవశేషాలు ఎకో టూరిజం అభివృద్ధికి సరికొత్త అవకాశాలు సృష్టిస్తాయి. దీని వలన ఆర్థిక మరియు సాంస్కృతిక లాభాలు ఉన్నాయి.
పవన్ కళ్యాణ్ ఈ సందర్భంగా వీటి గురించి చెబుతూ “అటవీ ప్రాంతాల్లోని చారిత్రక కట్టడాలు, పురావస్తు అవశేషాలు ఎకో టూరిజం అభివృద్ధికి సరికొత్త అవకాశాలు సృష్టిస్తాయని” తెలిపారు. దీనివల్ల ప్రకృతి, వారసత్వ సంపదల పట్ల ప్రజల్లో చైతన్యం కలుగుతుంది. స్థానిక ప్రజలకు ఉపాధి అవకాశాలు పెరుగుతాయి. పర్యాటక ఆదాయం ద్వారా జిల్లా అభివృద్ధి సాధ్యమవుతుంది. మన చరిత్ర, సంస్కృతిని భావితరాలకు అందించే వీలు కలుగుతుంది అన్నారు.
అంతే కాకుండా “ప్రకృతి సంపదతోపాటు సాంస్కృతిక వారసత్వాన్ని పరిరక్షిస్తూ భావితరాలకు అందించే విషయంలో ఆంధ్రప్రదేశ్ ప్రభుత్వం దృఢ సంకల్పంతో ముందుకు వెళ్తుంది” అన్నారు ఉప ముఖ్యమంత్రి పవన్ కళ్యాణ్. ఈ వాగ్దానం నిజమైతే, నల్లమల అడవి కేవలం పులి సంరక్షణ కేంద్రం మాత్రమే కాదు, భారత దక్షిణ చరిత్రకు నిలయంగా నిలుస్తుంది.
నల్లమలలో చరిత్ర జాడల అన్వేషణ కేవలం పురావస్తు సర్వే మాత్రమే కాదు, ఇది మన గతానికి గుర్తింపు, భవిష్యత్తును నిర్మించే ప్రయాణం. అటవీ శాఖ సహకారం తో, ప్రకృతి మరియు చరిత్ర రెండూ సంరక్షించబడి, భావితరాలకు అందాలి. ఈ దృష్టికోణమే ఆంధ్రప్రదేశ్కు కొత్త మార్గదర్శకం అవుతుంది.
సారాంశం: నల్లమల అటవీ ప్రాంతంలో ఏఎస్ఐ సర్వేకు అనుమతి ఇచ్చి పవన్ కళ్యాణ్ వారికి శుభాకాంక్షలు తెలియజేశారు. ఎకో టూరిజం అవకాశాలు, వన్యప్రాణి సంరక్షణతో సమతుల్యత ఇవే ఈ చారిత్రక నిర్ణయం వెనుక ముఖ్య కారణాలు.
