తిరుమలలో భక్తుల ఆగ్రహం… తాకిడి పెరిగినప్పుడు ముందస్తు చర్యలు తీసుకోరా అంటూ నిలదీత
డిసెంబర్ 26, 2025 Published by Rahul N
తిరుమలలో శ్రీవారి దర్శనానికి వచ్చిన భక్తులు మేనేజ్మెంట్పై తీవ్ర అసంతృప్తి వ్యక్తం చేశారు. కనీస సౌకర్యాలు కూడా సక్రమంగా కల్పించకపోవడంపై ఆగ్రహం వ్యక్తం చేస్తూ భక్తులు పోలీసులను నిలదీశారు. భక్తుల తాకిడి భారీగా పెరిగినప్పుడు ముందస్తు చర్యలు ఎందుకు తీసుకోవడం లేదని ప్రశ్నించారు.
ప్రత్యేకించి టికెట్ కౌంటర్లు తగినంతగా ఏర్పాటు చేయకపోవడం వల్ల గంటల తరబడి క్యూలైన్లలో వేచి ఉండాల్సి వస్తోందని భక్తులు వాపోయారు. భక్తుల సంఖ్య పెరిగిన సందర్భాల్లో అదనపు కౌంటర్లు ఏర్పాటు చేయలేరా అంటూ అధికారులను ప్రశ్నించారు.
అలాగే వీఐపీలకే ఎక్కువ ప్రాధాన్యం ఇస్తూ, సామాన్య భక్తులను పట్టించుకోవడం లేదని పలువురు ఆవేదన వ్యక్తం చేశారు. వీఐపీలతో పాటు సాధారణ భక్తులకు కూడా సమాన అవకాశాలు కల్పించాలని డిమాండ్ చేశారు.
శ్రీవారి క్షేత్రంగా ప్రసిద్ధి చెందిన తిరుమలలో భక్తుల సౌకర్యాలే ప్రధానమని, అందుకు తగిన విధంగా తిరుమల తిరుపతి దేవస్థానాలు ఏర్పాట్లు మెరుగుపరచాలని భక్తులు కోరుతున్నారు. భవిష్యత్తులో ఇటువంటి సమస్యలు తలెత్తకుండా సమర్థవంతమైన ప్రణాళికలు అమలు చేయాలని వారు సూచించారు.
